Kiyevda rossiyalik qochoq deputat o‘ldirib ketildi. Ukraina prezidenti bu qotillikni “Rossiya tomonidan amalga oshirilgan terakt” deb atadi

Ukraina prezidenti Pyotr Poroshenko Rossiya Davlat dumasining sobiq deputati Denis Voronenkovning Kiyevda o‘ldirib ketilganini “Rossiya tomonidan amalga oshirilgan terrorizm harakati” deb atadi.

“Bu Rossiya maxsus xizmatlarining bungacha Yevropaning turli poytaxtlarida bir necha bor aks etgan harakatlarining ochiq-oydin takrori”, — deb Poroshenkoning so‘zlaridan iqtibos keltirmoqda Meduza.

Poroshenkoning ta’kidlashicha, Voronenkov Rossiyaning Ukrainaga nisbatan tajovuzining, xususan, Ukraina hududiga Rossiya qo‘shinlari kiritilishida Ukraina sobiq prezidenti Yanukovichning roli haqida bilgan eng asosiy guvohlardan biri edi.

Denis Voronenkov 23-mart, payshanba kuni Kiyev markazida, “Premyer-palas” mehmonxonasidan chiqqan vaqti otib ketildi. U hodisa joyida halok bo‘lgan. Uning qo‘riqchisi killerni yarador qilishga ulgurgan, killer kasalxonaga yotqizilgan. Qo‘riqchining o‘zi ham yaralangan. Voronenkovga kim o‘q quzgani noma’lum.

Voronenkov Ukrainaga 2016-yili, Rossiya parlamenti deputati vakolatlaridan mahrum bo‘lishidan avval ko‘chib o‘tgan edi. Rossiyada u biznesni reyderlik yo‘li bilan egallab olish ishi bo‘yicha ayblanayotgan edi. Kiyevda Voronenkov davlatga xiyonat ishi bo‘yicha ko‘rsatma bergan edi, mazkur ish bo‘yicha Ukraina sobiq prezidenti Viktor Yanukovich ayblanmoqda.

“Daryo”ning Telegram’dagi rasmiy kanali — @toshqindaryo’ga a’zo bo‘ling!