Киевда россиялик қочоқ депутат ўлдириб кетилди. Украина президенти бу қотилликни «Россия томонидан амалга оширилган теракт» деб атади

Украина президенти Пётр Порошенко Россия Давлат думасининг собиқ депутати Денис Вороненковнинг Киевда ўлдириб кетилганини «Россия томонидан амалга оширилган терроризм ҳаракати» деб атади.

«Бу Россия махсус хизматларининг бунгача Европанинг турли пойтахтларида бир неча бор акс этган ҳаракатларининг очиқ-ойдин такрори», — деб Порошенконинг сўзларидан иқтибос келтирмоқда Meduza.

Порошенконинг таъкидлашича, Вороненков Россиянинг Украинага нисбатан тажовузининг, хусусан, Украина ҳудудига Россия қўшинлари киритилишида Украина собиқ президенти Януковичнинг роли ҳақида билган энг асосий гувоҳлардан бири эди.

Денис Вороненков 23 март, пайшанба куни Киев марказида, «Премьер-палас» меҳмонхонасидан чиққан вақти отиб кетилди. У ҳодиса жойида ҳалок бўлган. Унинг қўриқчиси киллерни ярадор қилишга улгурган, киллер касалхонага ётқизилган. Қўриқчининг ўзи ҳам яраланган. Вороненковга ким ўқ қузгани номаълум.

Вороненков Украинага 2016 йили, Россия парламенти депутати ваколатларидан маҳрум бўлишидан аввал кўчиб ўтган эди. Россияда у бизнесни рейдерлик йўли билан эгаллаб олиш иши бўйича айбланаётган эди. Киевда Вороненков давлатга хиёнат иши бўйича кўрсатма берган эди, мазкур иш бўйича Украина собиқ президенти Виктор Янукович айбланмоқда.

«Дарё»нинг Telegram’даги расмий канали — @toshqindaryo’га аъзо бўлинг!