Saudiya Arabistoni qiroli Salmon ibn Abdulaziz Al Saud Indoneziyaga to‘qqiz kunlik safar uchun o‘zi bilan 450 tonna yuk oldi, deb yozadi “Kommersant”.
Qirol ikkita Mercedes-Benz S600 avtomobili va ikkita elektr yukko‘targichni o‘zi bilan olib ketgani ma’lum. Shuningdek, yuklar orasiga uning 1,5 ming kishilik mulozimlariga zarur bo‘lgan buyumlar ham kiritilgan bo‘lishi mumkin.
Nashr ta’kidlashicha, Saudiya qirollari o‘zlarini biror narsada chegaralashga o‘rganmagan. 1999-yilda qirol Fahd Ispaniyaning Marbelya kurortiga ketishda 200 tonna yukni o‘zi bilan olgan edi. Qirol Abdulla esa 2011-yilda Nyu-Yorkka borib jarrohlik operatsiyasini boshidan o‘tkazgach, uyga xaridlar bilan qaytgan, ular esa uchta samolyotga zo‘rg‘a sig‘gan edi. Yana bir arab yetakchisi — Liviya sobiq rahbari Muammar Qaddafiy butun dunyo bo‘ylab o‘zining hashamatli chodirini olib yurardi.
Rossiya prezidentlari parvozlarda bunday isrofgarchiliklarga yo‘l qo‘ygani qayd etilmagan. Faqat shu narsa ma’lumki, Vladimir Putin chet elga o‘zi bilan Mercedes Pullman avtomobilini olib ketadi. Mashina oldindan poyezdning yuk vagonida yoki samolyotda yuboriladi.
Ba’zi yetakchilar esa o‘zlarini bundan ham kamtar tutadi. Masalan, mustaqil Belarusning birinchi prezidenti Stanislav Shushkevich safarlarga o‘zi bilan ortiqcha kostyum, bir nechta ko‘ylak, bir-ikkita galstuk olib ketgan xolos.
Izoh (0)