Саудия қироли Индонезияга 9 кунлик сафарга 450 тонна юк олиб кетди ёхуд давлат раҳбарлари сафарларга қанча юк билан отланади?

Саудия Арабистони қироли Салмон ибн Абдулазиз Ал Сауд Индонезияга тўққиз кунлик сафар учун ўзи билан 450 тонна юк олди, деб ёзади «Коммерсантъ».

Қирол иккита Mercedes-Benz S600 автомобили ва иккита электр юккўтаргични ўзи билан олиб кетгани маълум. Шунингдек, юклар орасига унинг 1,5 минг кишилик мулозимларига зарур бўлган буюмлар ҳам киритилган бўлиши мумкин.

Нашр таъкидлашича, Саудия қироллари ўзларини бирор нарсада чегаралашга ўрганмаган. 1999 йилда қирол Фаҳд Испаниянинг Марбелья курортига кетишда 200 тонна юкни ўзи билан олган эди. Қирол Абдулла эса 2011 йилда Нью-Йоркка бориб жарроҳлик операциясини бошидан ўтказгач, уйга харидлар билан қайтган, улар эса учта самолётга зўрға сиғган эди. Яна бир араб етакчиси — Ливия собиқ раҳбари Муаммар Қаддафий бутун дунё бўйлаб ўзининг ҳашаматли чодирини олиб юрарди.

Россия президентлари парвозларда бундай исрофгарчиликларга йўл қўйгани қайд этилмаган. Фақат шу нарса маълумки, Владимир Путин чет элга ўзи билан Mercedes Pullman автомобилини олиб кетади. Машина олдиндан поезднинг юк вагонида ёки самолётда юборилади.

Баъзи етакчилар эса ўзларини бундан ҳам камтар тутади. Масалан, мустақил Беларуснинг биринчи президенти Станислав Шушкевич сафарларга ўзи билан ортиқча костюм, бир нечта кўйлак, бир-иккита галстук олиб кетган холос.