Prezident Shavkat Mirziyoyev tomonidan ilgari surilgan 2017—2021-yillarda O‘zbekiston Respublikasini rivojlantirishning besh ustuvor yo‘nalishi bo‘yicha Harakat strategiyasi loyihasi jamoatchilik, ekspertlar, ilmiy doiralar, fuqarolik jamiyati instituti vakillari tomonidan keng muhokama qilinmoqda. Oliy Majlisi Qonunchilik palatasi deputati, siyosiy fanlar doktori Ilhom Abdullayev “Daryo”ga loyiha yuzasidan quyidagi fikrlarni bildirdi.
— Harakat strategiyasi loyihasi matni barcha xohlovchilar bevosita tanishib chiqishi uchun internet tarmog‘iga joylashtirildi. Bunda har bir kishi normativ-huquqiy hujjatlar ta’sirini baholash tizimi portali orqali yoki mazkur hujjat muhokamasi bo‘yicha parlament, ilmiy va ta’lim muassasalari, ommaviy axborot vositalari, ekspertlar hamjamiyati tomonidan tashkil qilinayotgan tadbirlarda bevosita ishtirok etishi hamda fikr-mulohazalari, takliflarini bildirishi mumkin.
Harakat strategiyasining asosi inson manfaatlarini ta’minlash bilan bog‘liq vazifalardan iborat. Ular davlat rahbarining saylovoldi dasturida, shuningdek, O‘zbekiston Respublikasi Konstitutsiyasi qabul qilinganining 24 yilligiga bag‘ishlangan tantanali marosimdagi ma’ruzasida, Oliy Majlis palatalari qo‘shma majlisidagi hamda Vazirlar Mahkamasining kengaytirilgan majlisida belgilab berilgan edi.
Davlat qurilishi, sud-huquq tizimini takomillashtirish, iqtisodiyotni erkinlashtirish hamda ijtimoiy sohani rivojlantirish, millatlararo do‘stlik va hamjihatlikni mustahkamlash bo‘yicha eng dolzarb vazifalar aniq belgilab berilayotgan Harakat strategiyasi mamlakatni keyingi besh yilda isloh qilishning “yo‘l xaritasi”ga aylanadi.
Harakat strategiyasini amalga oshirish besh bosqichda taklif qilinib, bu bo‘yicha har yili alohida davlat dasturlari qabul qilinishi ko‘zda tutilmoqda. Bu esa dasturga mavjud vaziyat, ichki va xalqaro shart-sharoitlar, mamlakatni ijtimoiy-iqtisodiy rivojlantirishning ustuvor yo‘nalishlaridan kelib chiqib, o‘z vaqtida zarur o‘zgartishlarni kiritish imkonini beradi.
O‘zbekiston tomonidan Harakat strategiyasi qabul qilinishi rejalashtirish-prognozlashtirish bo‘yicha faoliyatning xalqaro amaliyotiga to‘la mos keladi. Masalan, Kanada, Yaponiya, Janubiy Koreya va boshqa mamlakatlarda qabul qilingan milliy rivojlanish strategiyalari dunyo hamjamiyatida keng nom qozongan bo‘lib, hozirgacha ijobiy natija keltirmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)