Президент Шавкат Мирзиёев томонидан илгари сурилган 2017—2021 йилларда Ўзбекистон Республикасини ривожлантиришнинг беш устувор йўналиши бўйича Ҳаракат стратегияси лойиҳаси жамоатчилик, экспертлар, илмий доиралар, фуқаролик жамияти институти вакиллари томонидан кенг муҳокама қилинмоқда. Олий Мажлиси Қонунчилик палатаси депутати, сиёсий фанлар доктори Илҳом Абдуллаев «Дарё»га лойиҳа юзасидан қуйидаги фикрларни билдирди.
— Ҳаракат стратегияси лойиҳаси матни барча хоҳловчилар бевосита танишиб чиқиши учун интернет тармоғига жойлаштирилди. Бунда ҳар бир киши норматив-ҳуқуқий ҳужжатлар таъсирини баҳолаш тизими портали орқали ёки мазкур ҳужжат муҳокамаси бўйича парламент, илмий ва таълим муассасалари, оммавий ахборот воситалари, экспертлар ҳамжамияти томонидан ташкил қилинаётган тадбирларда бевосита иштирок этиши ҳамда фикр-мулоҳазалари, таклифларини билдириши мумкин.
Ҳаракат стратегиясининг асоси инсон манфаатларини таъминлаш билан боғлиқ вазифалардан иборат. Улар давлат раҳбарининг сайловолди дастурида, шунингдек, Ўзбекистон Республикаси Конституцияси қабул қилинганининг 24 йиллигига бағишланган тантанали маросимдаги маърузасида, Олий Мажлис палаталари қўшма мажлисидаги ҳамда Вазирлар Маҳкамасининг кенгайтирилган мажлисида белгилаб берилган эди.
Давлат қурилиши, суд-ҳуқуқ тизимини такомиллаштириш, иқтисодиётни эркинлаштириш ҳамда ижтимоий соҳани ривожлантириш, миллатлараро дўстлик ва ҳамжиҳатликни мустаҳкамлаш бўйича энг долзарб вазифалар аниқ белгилаб берилаётган Ҳаракат стратегияси мамлакатни кейинги беш йилда ислоҳ қилишнинг «йўл харитаси»га айланади.
Ҳаракат стратегиясини амалга ошириш беш босқичда таклиф қилиниб, бу бўйича ҳар йили алоҳида давлат дастурлари қабул қилиниши кўзда тутилмоқда. Бу эса дастурга мавжуд вазият, ички ва халқаро шарт-шароитлар, мамлакатни ижтимоий-иқтисодий ривожлантиришнинг устувор йўналишларидан келиб чиқиб, ўз вақтида зарур ўзгартишларни киритиш имконини беради.
Ўзбекистон томонидан Ҳаракат стратегияси қабул қилиниши режалаштириш-прогнозлаштириш бўйича фаолиятнинг халқаро амалиётига тўла мос келади. Масалан, Канада, Япония, Жанубий Корея ва бошқа мамлакатларда қабул қилинган миллий ривожланиш стратегиялари дунё ҳамжамиятида кенг ном қозонган бўлиб, ҳозиргача ижобий натижа келтирмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)