“Nasaf” Chempionlar ligasini yirik g‘alaba bilan boshlab, Bahrayn chempionini turnirdan chiqarib yubordi

Qarshining “Nasaf” klubi Osiyo Chempionlar ligasining o‘tish bosqichida yirik g‘alabaga erishib, pley-off raundiga yo‘l oldi. Bahrayn chempioni “Al-Hidd”ni Toshkentda qabul qilgan Ro‘ziqul Berdiyev shogirdlari 4:0 hisobida zafar quchdi.

• “Nasaf” — “Al-Hidd” 4:0. Matnli onlayn

Bellashuvdagi ikkita gol dastlabki 45 daqiqalikda kiritildi va har ikkisida ham golli uzatmani “Nasaf”ning yangi a’zosi Akmal Shorahmedov uzatib berdi. Uning jarima zarbasidan oshirib bergan paslarini avvaliga Shahboz Erkinov, keyinroq esa Igor Golban boshi bilan golga aylantirdi. Qayd etish kerak, O‘zbekiston milliy terma jamoasiga Samvel Babayan bosh murabbiy bo‘lgach, Shorahmedovning qadami bosh jamoadan uzilgandi. “Bunyodkor” bosh murabbiyi Sergey Lushchan esa jamoa sardori sifatida faoliyat olib borayotgan himoyachini olib qolishni istamadi.

Ikkinchi bo‘limda kiritilgan o‘yindagi uchinchi gol zaxiradan maydonga tushgan Doniyor Narzullayev tomonidan urildi. O‘yin asosiy vaqti yakunida esa Dragan Cheran kuchli zarbasi bilan hisobni 4:0 ko‘rinishiga olib keldi. Bahraynliklar bu gollarga bitta ham javob qaytara olmay, Osiyo Chempionlar ligasidagi ishtirokiga yakun yasadi.

“Nasaf” pley-off o‘yinini 7-fevral kuni Saudiya Arabistonida “Al-Fotih” klubiga qarshi o‘tkazadi. Shu kuni Toshkentning “Bunyodkor” klubi Qatarda Sardor Rashidov to‘p suradigan “Al-Jaish” bilan bellashadi.

Osiyo Chempionlar ligasi O‘tish o‘yini 31-yanvar, seshanba

“Nasaf” (O‘zbekiston) — “Al-Hidd” (Bahrayn) 4:0

Gollar: Shahboz Erkinov, 16 (1:0). Igor Golban, 26 (2:0). Doniyor Narzullayev, 76 (3:0). Dragan Cheran, 90+1 (4:0).

“Nasaf”: Sanjar Quvvatov —Akmal Shorahmedov, Sherzod A’zamov, Igor Golban, Farruh Sayfiyev, Aziz G‘aniyev, Odil Hamrobekov (Dilshod Rahmatullayev, 85), Bahrom Abdurahimov, Islom Kenjaboyev (Doniyor Narzullayev, 69), Shahboz Erkinov (Bobur Abduxoliqov, 78), Dragan Cheran.