«Насаф» Чемпионлар лигасини йирик ғалаба билан бошлаб, Баҳрайн чемпионини турнирдан чиқариб юборди

Қаршининг «Насаф» клуби Осиё Чемпионлар лигасининг ўтиш босқичида йирик ғалабага эришиб, плей-офф раундига йўл олди. Баҳрайн чемпиони «Ал-Ҳидд»ни Тошкентда қабул қилган Рўзиқул Бердиев шогирдлари 4:0 ҳисобида зафар қучди.

• «Насаф» — «Ал-Ҳидд» 4:0. Матнли онлайн

Беллашувдаги иккита гол дастлабки 45 дақиқаликда киритилди ва ҳар иккисида ҳам голли узатмани «Насаф»нинг янги аъзоси Акмал Шораҳмедов узатиб берди. Унинг жарима зарбасидан ошириб берган пасларини аввалига Шаҳбоз Эркинов, кейинроқ эса Игорь Голбан боши билан голга айлантирди. Қайд этиш керак, Ўзбекистон миллий терма жамоасига Самвел Бабаян бош мураббий бўлгач, Шораҳмедовнинг қадами бош жамоадан узилганди. «Бунёдкор» бош мураббийи Сергей Лушчан эса жамоа сардори сифатида фаолият олиб бораётган ҳимоячини олиб қолишни истамади.

Иккинчи бўлимда киритилган ўйиндаги учинчи гол захирадан майдонга тушган Дониёр Нарзуллаев томонидан урилди. Ўйин асосий вақти якунида эса Драган Черан кучли зарбаси билан ҳисобни 4:0 кўринишига олиб келди. Баҳрайнликлар бу голларга битта ҳам жавоб қайтара олмай, Осиё Чемпионлар лигасидаги иштирокига якун ясади.

«Насаф» плей-офф ўйинини 7 февраль куни Саудия Арабистонида «Ал-Фотиҳ» клубига қарши ўтказади. Шу куни Тошкентнинг «Бунёдкор» клуби Қатарда Сардор Рашидов тўп сурадиган «Ал-Жаиш» билан беллашади.

Осиё Чемпионлар лигаси Ўтиш ўйини 31 январь, сешанба

«Насаф» (Ўзбекистон) — «Ал-Ҳидд» (Баҳрайн) 4:0

Голлар: Шаҳбоз Эркинов, 16 (1:0). Игорь Голбан, 26 (2:0). Дониёр Нарзуллаев, 76 (3:0). Драган Черан, 90+1 (4:0).

«Насаф»: Санжар Қувватов —Акмал Шораҳмедов, Шерзод Аъзамов, Игорь Голбан, Фарруҳ Сайфиев, Азиз Ғаниев, Одил Ҳамробеков (Дилшод Раҳматуллаев, 85), Баҳром Абдураҳимов, Ислом Кенжабоев (Дониёр Нарзуллаев, 69), Шаҳбоз Эркинов (Бобур Абдухолиқов, 78), Драган Черан.