АҚШ президенти Дональд Трамп томонидан мамлакатга қочоқлар ва муҳожирлар кириши учун киритилган чекловлар муносабати билан Бруклиндаги федерал суд қаршисидаги майдон норозилик ҳаракатларининг янги ўчоғига айланди, деб ёзади «РИА Новости». Ушбу суд аввалроқ президентнинг янги фармони таъсир доирасига тушадиган кишиларни депортация қилишни вақтинчалик тақиқлаган эди.
Суд биноси яқинига тўпланган юзлаб одамлар қабул қилинган қарорни катта ғалаба деб атамоқда. Акциянинг кўплаб иштирокчилари «Қочоқлар, хуш келибсиз» ва «Барчамиз муҳожирмиз» ёзувлари туширилган плакатларни кўтариб олган. Шундай шиорлар ижтимоий тармоқларда оммабоп хештэгларга айланиб улгурди.
Шунингдек, Нью-Йоркдаги Жон Кеннеди номли аэропорт терминаллари қаршисида АҚШ янги президентининг иммиграция сиёсатига қарши норозилик акциялари бўлиб ўтмоқда. Бруклин федерал судининг қарори ҳақидаги янгилик намойишчилар томонидан қувонч билан кутиб олинди, халойиқ «Озодлик!» ва «Адолат!» дея ҳайқирди.
Изоҳ (0)