Kuvaytda yetti sudlanuvchi, xususan, mamlakatda hukmron bo‘lgan qirollik oilasiga mansub shahzodaga nisbatan o‘lim jazosi ijro etildi. Meduza’ning yozishicha, sudlanuvchilar osilgan.
KUNA davlat agentligi tomonidan tarqatilgan axborotga ko‘ra, qatl etilganlar orasida shahzoda Faysal Abdulla al-Jobir as-Saboh ham bor: u rejalashtirilgan qotillik va noqonuniy ravishda o‘qotar qurolga egalik qilishda aybdor deb topilgan.
Qatl etilganlar orasida, shuningdek, o‘z ish beruvchisining 22 yoshli qizini o‘ldirgan filippinlik uy xizmatchisi — Jakatia Pava ham bor. Pava o‘ziga qo‘yilgan ayblovni qat’iy rad etgan. Filippin Tashqi ishlar vazirligi Kuvayt hukumatidan ayolni avf etishni so‘ragan edi.
Bundan tashqari, KUNA axborotiga ko‘ra, Misrning ikki fuqarosi, bir bangladeshlik, bir efiopiyalik va yana bir kuvaytlik qatl etilgan.
Kuvayt ma’muriyati so‘nggi bor ommaviy qatlni 2013-yili uyushtirgan, o‘shanda uch xorijlik osilgan edi.
Kuvaytda qirollik oilasi a’zosiga nisbatan qatl jazosi so‘nggi bor 2016-yil dekabrida ijro etilgan edi. O‘shanda shahzoda Turki bin Saud al-Kabir osishga hukm qilingan.
U mushtlashuv vaqtida Saudiya Arabistoni fuqarosini o‘ldirganlikda ayblangan edi. Kuwait Times’ning yozishicha, bungacha Kuvayt qirollik oilasi a’zolari 1977-yildan beri qatl etilmagan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)