Кувайтда етти судланувчи, хусусан, мамлакатда ҳукмрон бўлган қироллик оиласига мансуб шаҳзодага нисбатан ўлим жазоси ижро этилди. Meduza’нинг ёзишича, судланувчилар осилган.
KUNA давлат агентлиги томонидан тарқатилган ахборотга кўра, қатл этилганлар орасида шаҳзода Файсал Абдулла ал-Жобир ас-Сабоҳ ҳам бор: у режалаштирилган қотиллик ва ноқонуний равишда ўқотар қуролга эгалик қилишда айбдор деб топилган.
Қатл этилганлар орасида, шунингдек, ўз иш берувчисининг 22 ёшли қизини ўлдирган филиппинлик уй хизматчиси — Жакатиа Пава ҳам бор. Пава ўзига қўйилган айбловни қатъий рад этган. Филиппин Ташқи ишлар вазирлиги Кувайт ҳукуматидан аёлни авф этишни сўраган эди.
Бундан ташқари, KUNA ахборотига кўра, Мисрнинг икки фуқароси, бир бангладешлик, бир эфиопиялик ва яна бир кувайтлик қатл этилган.
Кувайт маъмурияти сўнгги бор оммавий қатлни 2013 йили уюштирган, ўшанда уч хорижлик осилган эди.
Кувайтда қироллик оиласи аъзосига нисбатан қатл жазоси сўнгги бор 2016 йил декабрида ижро этилган эди. Ўшанда шаҳзода Турки бин Сауд ал-Кабир осишга ҳукм қилинган.
У муштлашув вақтида Саудия Арабистони фуқаросини ўлдирганликда айбланган эди. Kuwait Times’нинг ёзишича, бунгача Кувайт қироллик оиласи аъзолари 1977 йилдан бери қатл этилмаган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)