Samvel Babayan: Dubayda Denisov, Krimets va Ismoilovning yo‘qligi bilinib, 2 ta o‘yinda 4 ta gol o‘tkazdik

O‘zbekiston milliy terma jamoasi bosh murabbiyi Samvel Babayan Amirlik yig‘inidan keyin O‘FF matbuot xizmatiga intervyu berdi va futbolchilarni to‘plashdan maqsadni tushuntirdi.

Suriyaga qarshi o‘yin oldidan bo‘lib o‘tgan yig‘indan ko‘nglim to‘ldi. O‘tkazilgan har ikki o‘yindan keyin o‘zimiz uchun kerakli xulosalar chiqarib oldik.

Daniyaga qarshi tajribaviy tarkibni maydonga tushirdik. Gruziyaga qarshi o‘yinda esa asosiy futbolchilar harakat qildi. Bular FIFA kunlaridan tashqarida bo‘lgani uchun legioner futbolchilarni taklif qila olmadik.

Terma asosini “Lokomotiv”, “Paxtakor”, “Bunyodkor” va “Buxoro” futbolchilari tashkil qildi. “Nasaf” chempionlar ligasining o‘tish bosqichiga tayyorgarlik ko‘rayotgani uchun, uning a’zolari Amirlik yig‘iniga taklif etilmadi.

Samvel Babayan, O‘zbekiston MTJ bosh murabbiyi

Bosh murabbiyning so‘zlariga ko‘ra, terma jamoa futbolchilari maydonda bor kuchi bilan harakat qilgan va terma modeliga asosan to‘p surgan.

Termaning asosiy tarkibiga kiradigan futbolchilar o‘yinidan qoniqish hosil qildim. Shunga qaramay, Vitaliy Denisov, Anzur Ismoilov, Yegor Krimets kabi futbolchilarning yo‘qligi bilindi. Chunki 2 ta o‘yinda 4 ta gol o‘tkazib yubordik. Ularning yarmi standart vaziyatlardan urildi.

Endi xatolar ustida ishlab, tahlil qilishimiz hamda keyingi uchrashuvlarga qadar ularni bartaraf qilishimiz lozim.

Samvel Babayan, O‘zbekiston MTJ bosh murabbiyi

Qayd etish kerak, O‘zbekiston milliy terma jamoasi Amirlik yig‘inida Daniya U23 termasiga 1:2 hisobida imkoniyatni boy berdi, Gruziya bilan esa 2:2 hisobida durang o‘ynadi. Samvel Babayanning aytishiga ko‘ra, asosiy e’tibor Gruziyaga qarshi o‘yinga qaratilgandi.

Himoyada yo‘l qo‘yilgan xatolarni aytmasa, ustunlik biz tomonda bo‘ldi. Hujum chizig‘ida muammolar yuzaga kelgani uchun yaratilgan imkoniyatlardan to‘liq foydalanilmadi. Buning ustida ishlashimiz kerak.

To‘g‘ri, ustunlikni urilgan gollar bilan namoyish qilishimiz kerak edi. Biroq ketma-ket ikkita gol o‘tkazib yuborib, qiyin ahvolda qoldik. Shunga qaramay futbolchilar o‘ziga bo‘lgan ishonchni yo‘qotmadi va to‘p nazoratini qo‘lga olib, hisobni tenglashtirdi.

Samvel Babayan, O‘zbekiston MTJ bosh murabbiyi

O‘zbekiston milliy terma jamoasi uchun javobgar shaxs kelgusidagi rejalar borasida ham to‘xtalgan. 9—12-fevral kuni bosh jamoa Turkiyada yig‘in olib boradi.

“Lokomotiv” va “Paxtakor”ning navbatdagi yig‘ini Turkiyada o‘tadi. Terma asosini shu klub futbolchilari tashkil etishini inobatga olib, biz ham yig‘inni o‘sha yerda olib borishga qaror qildik.

“Nasaf” 31-yanvar kuni o‘tish bosqichida ishtirok etib, pley-off bosqichiga yo‘l olsa, 7-fevral kuni safarda o‘yin o‘tkazadi. “Bunyodkor” ham 7-fevral kuni Qatarning “Al-Jaish” klubi bilan kurashadi. Shundan keyin bu ikki klubning bir nechtadan vakili terma yig‘iniga qo‘shiladi.

Turkiyada ikkita nazorat o‘yini o‘tkazishni rejalashtirganmiz. 12-fevral kuni Rossiya Premyer-ligasi klublaridan biriga qarshi o‘yin bo‘ladi. Ikkinchi o‘yin borasida tashkilotchilar muzokaralar olib bormoqda.

Samvel Babayan, O‘zbekiston MTJ bosh murabbiyi

Ma’lumot uchun, O‘zbekiston milliy terma jamoasining oldindagi eng yaqin rasmiy o‘yini 23-mart kuni Suriyaga qarshi bo‘lib o‘tadi.