Mourinyoga joy bor, Gvardiolaga esa yo‘q: UEFA barcha davrlarning eng yaxshi murabbiylari ro‘yxatini e’lon qildi

UEFA barcha davrlarning eng yaxshi murabbiylari 10 talik reytingini e’lon qildi. Ro‘yxatdan “Barselona” bilan 14 ta, “Bavariya” bilan 7 ta sovrinni qo‘lga kiritgan, xususan, Yevropa Chempionlar Ligasida 2 marta g‘olib chiqqan, hozirgi davrning eng sovrindor murabbiylaridan biri Xosep Gvardiola tushib qolgan.

UEFA tashkil etilgan 1954-yildan to hozirgi davrgacha bo‘lgan oraliqda faoliyat yuritgan shuningdek, faoliyatini davom ettirayotgan eng yaxshi 10 murabbiyni qamrab olgan ro‘yxat va bu mutaxassislarning qisqacha tarjimai holi bilan quyida tanishishingiz mumkin.

Brayan Klaf

Kichik klublar bilan murabbiylik sohasida katta yutuqlarga erishgan Brayan Klaf futbolchi sifatida ham yuksak saviya­da o‘ynab, Angliya chempionatlaridagi 274 ta uchrashuvda 251 ta gol urgan. 29 yoshida esa og‘ir jarohat tufayli futbolchilik faoliyatini yakunlab, murabbiylikni boshlaydi. Murabbiy sifatida 1971/1972-yilgi mavsumda kamtargina “Derbi Kaunti” bilan Angliya chempionligini, “Nottingem Forest” bilan esa ikki marta — 1979 va 1980-yillarda Yevropa Chempionlar Kubogini qo‘lga kiritadi.

Yoxan Kroyff

O‘z davrining eng kuchli futbolchilaridan biri bo‘lgan Yoxan Kroyff murabbiylik faoliyatida ham ulkan cho‘qqilarga erishgan. Uch bora “Oltin to‘p” sohibi murabbiylik faoliyati davrida Niderlandiyaning “Ayaks” klubi bilan ikki marta mamlakat kubogi va bir marta — 1987-yili Yevropa Kubok egalari kubogida g‘olib chiqadi.

Kroyffning murabbiylikdagi eng katta muvaffaqiyatlari Kataloniyaning “Barselona” jamoasi bilan bog‘liq. Jumladan, gollandiyalik mutaxassis klub bilan Ispaniya chempionatida qatorasiga 4-marta g‘alaba qozongan yagona murabbiydir.

Visente del Boske

Ham terma jamoa, ham klub miqyosida katta g‘alabalarga erisha olgan kam sonli murabbiylardan biri. Visente del Boske faoliyati davomida Madridning “Real” jamoasi bilan ikki marta UEFA Chempionlar ligasi g‘olibiga aylangan bo‘lsa, Ispaniya terma jamoasi bilan esa bir martadan Yevropa chempionati hamda Jahon chempionati musobaqalari g‘olibligini qo‘lga kiritgan.

Ser Aleks Fergyusson

So‘zsiz, dunyoning eng yaxshi murabbiylaridan biri. 1986-yildan 2013-yilga qadar Angliyaning “Manchester Yunayted” jamoasiga ustozlik qildi. Bu orada murabbiy Angliya Premyer-ligasida 13 marta, Yevropa Kubok egalari kubogida 1 marta, UEFA Chempionlar Ligasida esa 2 marta g‘olibga aylandi.

Elenio Errera

Asli kelib chiqishi ispaniyalik bo‘lgan Errera Argentinada tug‘ilgan. Murabbiy sifatida u Madridning “Atletiko”, Kataloniyaning “Barselona”, Milanning “Inter” jamoalari bilan ko‘plab sovrinlarni qo‘lga kiritgan. “Inter” bilan ikki bor Chempionlar Kubogini qo‘lga kiritish — shular jumlasidan.

Udo Lattek

Professional futbolchi Udo Lattekning birorta ham jiddiy natijasi yo‘q. Lekin murabbiy Udo Lattek katta-katta yutuqlarga erisha olgan. U “Bavariya”ni qatorasiga uch marta Germaniya chempioni, 1974-yili esa Chempionlar Kubogi sohibiga aylantirdi. Keyinchalik Myonxengladbaxning “Borussiya”sini bir necha bor milliy birinchilikda va bir marta UEFA Kubogida g‘olib qildi. U “Barselona” klubida ham samarali faoliyat yuritib, Kubok egalari kubogida va Liga kubogida chempion qildi. Shundan so‘ng “Bavariya”ga qaytib, jamoa bilan birga yana uch bor Germaniya chempioni bo‘ldi.

Valeriy Lobanovskiy

MDHdagi eng sovrindor murabbiylardan bo‘lgan Valeriy Lobanovskiy 1997-yil UEFA Chempionlar Ligasining guruh bosqichida Kataloniyaning “Barselona” jamoasini ikki o‘yin natijasiga ko‘ra yetti to‘p farqi bilan mag‘lub etib, futbol olamida o‘ziga xos maktab yaratganini isbot etgan edi. Lobanovskiy qo‘li ostida “Oltin to‘p”ning uch sovrindori — Oleg Bloxin, Igor Belanov va Andrey Shevchenkoning yetishib chiqqaniyoq murabbiyning qanday kuchli salohiyatga ega bo‘lganidan dalolat beradi.

Rinus Mixels

Total futbolning otasi sifati tilga olinadigan Rinus Mixels futbolga basketbol o‘yini tamoyillarini olib kirdi — to‘pga egalik qilingan paytda barcha hujumga o‘tadi, to‘p yo‘qotilgach esa barcha himoyalanadi. Murabbiyning yangi falsafasi tufayli “Ayaks” ketma-ket uch marotaba Yevropada eng kuchli deb e’tirof etiladi. Mixels Gollandiya terma jamoasi bilan 1988-yili Yevropa chempionati g‘olibiga aylandi.

Joze Mourinyo

Zamonaviy futbolning eng sovrindor murabbiylaridan biri. Mourinyo 2 marta UEFA Chempionlar Ligasida, 1 marta UEFA Kubogida g‘olib chiqqan. U:

• Portugaliyada — 2 marta chempion, 1 marta Kubok sohibi, 1 marta Superkubok sohibi;
• Angliyada — 3 marta chempion, 1 marta Kubok sohibi, 3 marta Liga kubogi sohibi, 2 marta Superkubok sohibi;
• Italiyada — 2 marta chempion, 1 marta Kubok sohibi, 1 marta Superkubok sohibi;
• Ispaniyada — 1 marta chempion, 1 marta Kubok sohibi, 1 marta Superkubok sohibi bo‘lgan.

Bu yutuqlar uning “Benazir” deb atalishiga to‘la asos bo‘la oladi.

Arrigo Sakki

Arrigo Sakki futbol tarixidagi eng yaxshi murabbiylardan biri sanaladi. Sakki to‘qqiz yillik sovrinsiz davrdan keyin “Milan”ni chempionlikka boshlab keldi. Bir necha marotaba yevrokuboklarda va ikki marotaba Qit’alararo kubokda “Milan”ni g‘olibga aylantirdi. 1994-yilgi mundialda Italiya termasini finalgacha olib kelgan murabbiy hal qiluvchi bahsda Braziliyaga imkoniyatni boy beradi. Lekin u barchaga xilma-xil taktikalarga asoslangan futbolni taqdim eta olgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.