Butunrossiya badiiy gimnastika federatsiyasi prezidenti, milliarder Alisher Usmonovning rafiqasi Irina Vinerning o‘g‘li Anton Viner o‘zining “‘Rodina’ guruhi” investitsiya-developerlik xoldingi kompaniyalaridan birini tugatib, ushbu loyihaning yana bir asoschisi — “Best-Novostroy” egadoshi Pavel Rodin bilan ayrilishdi, deb yozadi “RBK”.
Uch yil ichida xolding bir nechta yirik loyihalarni amalga oshirishni rejalashtirgan edi, ammo 2015-yildan buyon hozircha hech birini yakunlagani yo‘q.
Kompaniyaga endigina asos solingan vaqtda Viner uning “Moskva va Moskva viloyatidagi hududlarni kompleks o‘zlashtirish” loyihalarini amalga oshirish rejalarini oshkor qilgan edi.
“‘Rodina’ guruhi” boshqaruv raisi Pavel Rodin loyihadan chiqqanini hamda u ta’sischi bo‘lgan kompaniyaning tugatilishi aynan shu qaror bilan bog‘liq ekanligini tasdiqladi.
Anton Viner developerlik biznesi bilan besh yildan buyon shug‘ullanib keladi. 2012-yilda u “Ximki Grupp” kompaniyasini tuzgan va shahar tashqarisida ko‘chmas mulk qurilishiga qariyb 4 milliard dollar sarmoya kiritishga va’da bergan edi. Keyinroq ushbu kompaniyaga uning o‘gay otasi Alisher Usmonov 2 milliard rublga yaqin investitsiya kiritgani ma’lum bo‘ldi.
Milliarderning tuzilmalari 2013-yilda bosh “Ximki Grupp” YoAJning 50 foizini sotib olib, “Ximki Grupp” aksiyadorlari tarkibiga rasman kirdi. Qolgan aksiyalar uning o‘gay o‘g‘li qo‘lida qoldi. Ammo 2014-yilda Usmonovning USM Holdings tuzilmalaridan biri “Ximki Grupp”ning qolgan 50 foizini ham sotib oldi. O‘z navbatida, Anton Viner “Uryuk”, “Shale Beryozka”, “Cheretto” restoranlari, shuningdek, “San i Siti” go‘zallik salonlari tarmog‘iga egalik qilishda davom etdi.
Izoh (0)