Бутунроссия бадиий гимнастика федерацияси президенти, миллиардер Алишер Усмоновнинг рафиқаси Ирина Винернинг ўғли Антон Винер ўзининг «‘Родина’ гуруҳи» инвестиция-девелоперлик холдинги компанияларидан бирини тугатиб, ушбу лойиҳанинг яна бир асосчиси — «Бест-Новострой» эгадоши Павел Родин билан айрилишди, деб ёзади «РБК».
Уч йил ичида холдинг бир нечта йирик лойиҳаларни амалга оширишни режалаштирган эди, аммо 2015 йилдан буён ҳозирча ҳеч бирини якунлагани йўқ.
Компанияга эндигина асос солинган вақтда Винер унинг «Москва ва Москва вилоятидаги ҳудудларни комплекс ўзлаштириш» лойиҳаларини амалга ошириш режаларини ошкор қилган эди.
«‘Родина’ гуруҳи» бошқарув раиси Павел Родин лойиҳадан чиққанини ҳамда у таъсисчи бўлган компаниянинг тугатилиши айнан шу қарор билан боғлиқ эканлигини тасдиқлади.
Антон Винер девелоперлик бизнеси билан беш йилдан буён шуғулланиб келади. 2012 йилда у «Химки Групп» компаниясини тузган ва шаҳар ташқарисида кўчмас мулк қурилишига қарийб 4 миллиард доллар сармоя киритишга ваъда берган эди. Кейинроқ ушбу компанияга унинг ўгай отаси Алишер Усмонов 2 миллиард рублга яқин инвестиция киритгани маълум бўлди.
Миллиардернинг тузилмалари 2013 йилда бош «Химки Групп» ЁАЖнинг 50 фоизини сотиб олиб, «Химки Групп» акциядорлари таркибига расман кирди. Қолган акциялар унинг ўгай ўғли қўлида қолди. Аммо 2014 йилда Усмоновнинг USM Holdings тузилмаларидан бири «Химки Групп»нинг қолган 50 фоизини ҳам сотиб олди. Ўз навбатида, Антон Винер «Урюк», «Шале Берёзка», «Черетто» ресторанлари, шунингдек, «Сан и Сити» гўзаллик салонлари тармоғига эгалик қилишда давом этди.
Изоҳ (0)