O‘zbekiston Respublikasi Prezidenti Shavkat Mirziyoyev “Tadbirkorlik faoliyati va xususiy mulkni yanada rivojlantirish, davlat mulki obyektlarini sotishni soddalashtirish va tezlatish bo‘yicha qo‘shimcha chora-tadbirlari to‘g‘risida”gi Farmonni imzoladi. Bu haqda Davlat raqobat qo‘mitasi axborot xizmati xabar bermoqda.
Mazkur Farmon xususiy tadbirkorlikni rivojlantirish uchun qulay sharoitlar yaratish, ularga tovarlar ishlab chiqarish va xizmatlar ko‘rsatish uchun davlat mulki obyektlarini sotishni soddalashtirish va tezlatish hamda strategik ahamiyatga ega bo‘lmagan davlat mulklarini xususiylashtirishda byurokratik to‘siqlarni yo‘qotish, xususiy mulkka sotilgan obyektlar negizida raqobatbardosh mahsulotlarni (xizmatlar) ishlab chiqarishni yo‘lga qo‘yish maqsadida ishlab chiqildi.
Bundan tashqari, Farmonda strategik ahamiyatga ega bo‘lmagan korxonalarni va ularning ustav fondidagi davlat ulushlarini, davlat ko‘chmas mulk obyektlarini xususiylashtirish, shu jumladan, “nol” xarid qiymatida investitsiya kiritish sharti bilan berish o‘rnatilgan talablarga muvofiqligidan kelib chiqib xususiylashtirish to‘g‘risidagi qarorni qabul qilish huquqi Qoraqalpog‘iston Respublikasi Vazirlar Kengashi, viloyatlar va Toshkent shahar hokimlariga berilishi ko‘zda tutilgan.
Shuningdek, davlat mulkini ijaraga olgan va obyektni kapital ta’mirlagan, ishlab chiqarish va xizmat ko‘rsatish bo‘yicha asosiy vositalarni modernizatsiya qilgan, yangi ish o‘rinlari yaratgan ijarachilarga obyektni xususiylashtirish davrida unga birinchi navbatda xususiylashtirib olishga ustunlik huquqi beriladi.
Taklif yagona ishtirokchidan tushgan holatlarda davlat mulki obyektlarini olish-sotish shartnomalarini tuzishga ruxsat berildi. Xususiylashtirilayotgan obyekt bo‘yicha sotib olish to‘lovlarini to‘lash uchun 3 yillik muddat nazarda tutilgan.
Shuningdek, O‘zbekiston Respublikasi da’vogar-rezidentlaridan tanlov savdolarida qatnashish uchun biznes reja va buyurtmanomadan tashqari boshqa birorta hujjatlar talab qilish, xususiylashtirish natijalarini bekor qilish yoki qaytadan ko‘rib chiqishni talab qilish taqiqlanadi.
Farmonda, shuningdek, fond birjasida aksiyalarni aholi va tadbirkorlarga birlamchi (IPO) va ikkilamchi (SPO) ommaviy taklif etish ko‘zda tutilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)