Hozirda O‘zbekistonda 2130 nomdagi dori-darmon ishlab chiqarayotgan 145 farmatsevtika korxonasi faoliyat ko‘rsatmoqda. O‘tgan yil yakuni natijalariga ko‘ra, mahalliy dori vositalarining mamlakat ichki bozoridagi ulushi 55 foizni tashkil etdi. Bu haqda “Daryo” mobil muxbiri xabar bermoqda.
Mahalliy kompaniyalar nafaqat ichki bozor, balki eksport uchun ham mahsulotlar ishlab chiqarmoqda. O‘zbekistonda ishlab chiqarilayotgan 100 dan ortiq nomdagi dori-darmon va tibbiyot buyumlari dunyoning 20 ga yaqin davlati, jumladan, Yevropa Ittifoqi va AQShga eksport qilinmoqda.
O‘zbekiston Respublikasi Prezidentining “Aholini dori-darmon vositalari va tibbiyot buyumlari bilan ta’minlashni yanada yaxshilashga doir chora-tadbirlar to‘g‘risida”gi qaroriga muvofiq, joriy yil 1-yanvardan boshlab dori-darmon vositalari va tibbiyot buyumlarini ulgurji savdo uchun sotib olingan qiymatidan 15 foizdan, chakana savdo uchun ulgurji narxidan 20 foizdan ortiq bo‘lmagan miqdorlarda belgilanadigan cheklangan savdo ustamalari qo‘llanilgan holda amalga oshiriladi. Shu tariqa respublikaning har bir fuqarosiga, moddiy holati va yashash joyidan qat’i nazar, zarur dori-darmon vositalari va tibbiyot buyumlarini xarid qilish imkoniyati yaratilmoqda.
Shuningdek, 1-yanvardan e’tiboran 300 dan ortiq nomdagi dori-darmon vositalari uchun belgilangan narx o‘rnatilmoqda. Dori-darmon vositalari sifati nazorati bosh boshqarmasi boshlig‘i M. Ibrohimovaga ko‘ra, mazkur ro‘yxatga aholi uchun eng ahamiyatli, jumladan, saraton, qand kasalliklariga qarshi, operatsiyalar o‘tkazish uchun zarur dorilar kiritildi. Ushbu preparatlar barcha tibbiyot muassasalari va dorixonalarda, yetarli miqdorda, sifati tasdiqlangan va qulay narxlarda bo‘lishi lozim.
Mazkur choralar birinchi galda aholini sifatli va narxi qulay dori-darmon hamda tibbiyot buyumlari bilan ta’minlash, shuningdek, fuqarolar salomatligini mustahkamlashga qaratilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)