Қирғизистон ҳукумати Бишкек яқинидаги авиаҳалокат натижасида қурбон бўлганлар ва жабрланганларнинг оилаларига 70 минг қирғиз сўми (1 минг долларга яқин)дан тўлайди. Бу ҳақда ҳукумат мажлисида республика бош вазири Сооронбай Жээнбеков маълум қилди, деб ёзади «ТАСС».
«Ушбу моддий ёрдам бундай оилаларнинг ҳар бирига тақдим этилади», — деди бош вазир. Аввалроқ фавқулодда ҳодиса оқибатларини бартараф этиш бўйича штаб қурбонлар оилалари республика президенти Алмазбек Атамбаев фондидан ҳам 100 минг қирғиз сўмидан (тахминан 1,4 минг доллар) олиши ҳақида хабар тарқатган эди.
Гонконг—Бишкек—Истанбул йўналишида парвоз қилаётган Туркия компанияларидан бирига тегишли Boeing 16 январь куни Бишкекнинг Манас аэропортига қўниш вақтида яқиндаги дала-ҳовлилар жойлашган қишлоққа қулади. Лайнер 23 та бир қаватли турар-жойларни тўлиқ бузиб ташлади. Қирғизистон ФВВ маълумотларига кўра, ҳодиса натижасида камида 35 киши, шу жумладан, экипаж аъзолари ҳалок бўлди. Яна 13 нафар маҳаллий фуқаро Бишкек касалхоналарига етказилди.
Изоҳ (0)