Xitoy futbol klublari yaxshi futbolchini tekinga ham olishni biladi: “Chelsi”dagi Obi Mikel “Tyanszin Teda”ga o‘tdi

Londonning “Chelsi” jamoasida 10 yil to‘p surgan nigeriyalik yarim himoyachi Jon Obi Mikel Xitoyning “Tyanszin Teda” klubi a’zosiga aylandi, deb xabar bermoqda Daily Mail.

Xitoy klubi 29 yoshli futbolchini tekinga qo‘lga kiritdi, uning o‘zi bilan esa haftalik maoshi 140 ming funtga teng 3 yillik shartnoma imzoladi. Yarim himoyachi yangi klub safida 5-yanvar, payshanba kuni tibbiy ko‘rikdan o‘tgani ta’kidlanmoqda.

Obi Mikel “Chelsi”ning yangi bosh murabbiyi Antonio Konte ishonchini qozona olmagani uchun asosiy tarkibdagi joyini yo‘qotgan edi.

Ushbu mavsumda o‘zim istagandek yetarlicha o‘yin amaliyotiga ega bo‘lmadim. 29 yoshdaman va bir necha yil davomida to‘p surishni xohlayman. Shu sababli yangi chaqiruvlarga tayyor ekanimni sezdim. “Tyanszin Teda” a’zosiga aylanganimdan xursandman va klubning muvaffaqiyatiga o‘z hissamni qo‘shishga harakat qilaman. Janob Abramovich, klub xodimlari, murabbiylari, “Chelsi”dagi barchaga rahmat aytaman va xayr deb qolaman

Jon Obi Mikel, futbolchi

Ma’lumot o‘rnida, Jon Obi Mikel 2006-yilning zida Norvegiyaning “Lin Oslo” klubidan 17 million funt evaziga “Chelsi”ga kelib qo‘shilgandi. 29 yoshli futbolchi “Chelsi” tarkibida 372 o‘yinda maydonga tushib, 6 ta golga mualliflik qilgan.

London klubidagi faoliyati davomida u bir martadan YChL (2011/12) va Yevropa Ligasi (2012/13) g‘olibi, ikki karra Angliya chempioni (2010, 2015), to‘rt karra Angliya Kubogi (2007, 2009, 2010, 2012) hamda ikki bora Angliya Liga Kubogi (2007, 2015) sohibi bo‘lgan.

Nigeriya olimpiya terma jamoasi safida esa Obi Mikel Rio–2016 Olimpiadasining bronza medaliga sazovor bo‘lgandi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.