Bloger Farhod Mannopov o‘limi yuzasidan Toshkent shahar sudi jinoyat ishlari bo‘yicha sudlov hayʼati apellyatsiya instansiyasi hukm chiqardi. “Daryo” tanishgan sud hukmiga ko‘ra, Mannopovni operatsiya qilgan LOR-shifokor oqlangan.
LOR-shifokor oqlandi
LOR dastlabki sud hukmidan norozi bo‘lib, apellyatsiya shikoyati kiritgan. U asossiz ravishda ayblanganini aytib, oqlov hukmi chiqarishni so‘ragan.
Apellyatsiya instansiyasi joriy yil 22-iyulda jinoyat ishlari bo‘yicha Uchtepa tuman sudi 2024-yil 29-noyabrdagi hukmining LORga oid qismini bekor qilgan.
Shifokor Jinoyat kodeksi 117-moddasi 2-qismi hamda 116-modda 3-qismida nazarda tutilgan jinoyat yuzasidan qilmishida jinoyat alomatlari bo‘lmagani sabab Jinoyat protsessual kodeksi 83-moddasi 2 va 3-bandlariga asosan aybsiz deb topilib oqlandi. Jinoyat ishining unga oid qismi tugatildi.
Sud jarayonida o‘lim yuzasidan qator masalalar muhokama etilgan. Jumladan, uchta mutaxassis so‘roq qilingan. Ular operatsiya jarayonida LORda ayb bo‘lmaganini aytgan.
Birinchi guvoh — Apellyatsiya instansiyasi sudi majlisida qo‘shimcha guvoh sifatida Mudofaa vazirligi MHKG Otolaringologiya bo‘limi boshlig‘i, bosh otalaringolog bo‘lgan. Uning aytishicha, bemor LORning aybi bilan o‘lmagan. Aynan rinoplastika vaqtida LOR aybi bilan bemor isitmasi ko‘tarilib ketishi amaliyotda uchramagan.
Yana bir guvoh tariqasida Qurolli kuchlar Sud-tibbiy ekspertiza markazi vakili ham so‘roq qilingan. U o‘lim jarrohlik amaliyoti jarayonida dori vositasiga medikamentoz allergik reaksiya natijasida rivojlangan anafilaktik shok bo‘lganini aytgan. Ekspertlar tahliliga ko‘ra, bu klinik holatda marhum burun shilliq qavatlariga inyeksiya orqali yuborilgan “Novokain” mahalliy anestetik dori vositasi etiologik omil sifatida ishtirok etgani ehtimoldan xoli emas.
Sudda yana guvoh sifatida Ixtisoslashtirilgan allergologiya ilmiy-amaliy markazi shifokor allergologi ham so‘roq qilingan. Mazkur guvoh ham o‘lim sababini dori vositasiga allergik reaksiya oqibatida rivojlangan anafilaktik shok deb belgilashganini maʼlum qilgan.
Aybdor anesteziolog
Sud hukmida keltirilishicha, Farhod Mannopovni “Star Med Center” xususiy klinikasida operatsiya qilishda qatnashgan anesteziolog-reanimatolog shifokor tibbiy standartlarni qo‘pol tarzda buzgan. U bemorni yetarlicha tekshirmagan va to‘g‘ri tashxis qo‘ymagan. Masalan, allergik risklar bor-yo‘qligini tekshirmagan. Kardiolog tavsiyalarini olmagan. Anesteziologik muolaja natijasida yuzaga kelishi mumkin bo‘lgan turli oqibatlar yuz bergan taqdirda ularni bartaraf qilish choralarini ko‘rmay, anesteziya qo‘llash mumkinligiga tavsiya bergan.
Blogerga 2023-yil 3-mart kuni soat 13:40 da “Sevofluran” gazli narkoz muolajasi qo‘llangan. Mazkur dori vositasini miya jarohatlari mavjud bo‘lganda qo‘llash ma’n etilgan. Farhod Mannopov esa burnidan jiddiy jarohat olgani sabab klinikaga kelib, operatsiyaga rozi bo‘lgan.
Anestiziolog jarrohlik amaliyoti vaqtida bemor sog‘lig‘iga hamda o‘z kasbiga beeʼtibor bo‘lishda davom etgan. Anesteziya o‘tkazishda arterial bosim va yurak qisqarishlari sonini har 5 daqiqadan kam bo‘lmagan vaqtda o‘lchab turishi kerak bo‘lgan. Uzluksiz elektrokardioskopik nazorat o‘tkazish asosiy vazifalaridan hisoblangan. Ammo u operatsiya jarayonida telefonda bir necha daqiqa davomida gaplashib o‘tirgan. Suhbatlar operatsiya jarayonlariga bog‘liq bo‘lmagan.
Natijada bemor tana harorati ko‘tarilganini o‘z vaqtida aniqlamagan. Yo‘l qo‘ygan bir necha xatolari sabab bemor isitmasi ko‘tarilib, yuragi birinchi marta soat 16:30 da to‘xtab qolgan va koma holatiga tushgan. Bemorda ikkinchi marta soat 17:10 da, uchinchi marta soat 17:53 da yurak faoliyati to‘xtashi yuzaga kelgan.
Farhod Mannopov chuqur komatoz holatga tushib qolgani oqibatida o‘ziga kelmasdan, o‘tkir yurak qon-tomir, nafas, buyrak va jigar yetishmovchiligi, DVS sindromi, o‘pka va miya shishi (poliorgan yetishmovchilik) bilan 2023-yil 5-mart kuni soat 03:20 da klinikaning o‘zida vafot etgan. Marhum 27 yoshda bo‘lgan.
Maʼlumot uchun, Jinoyat ishi 2023-yil sentyabr oyida sudga oshirilgan edi. 2023-yil oktyabrida marhumning yaqinlari iltimosi bilan sud jarayonning OAVda yoritilishini taqiqlagan.
Izoh (0)