Aktyor, rejissor va prodyuser Yoqub Ahmedov Instagram’dagi sahifasida ukalari bilan tushgan suratni e’lon qildi.
Suratda, Yoqub Ahmedovning ikki futbolchi ukasi — yaqinda Xitoyning “Shanxay SIPG” jamoasiga o‘tgan Odil Ahmedov va “Paxtakor” yarim himoyachisi hisoblangan Azim Ahmedovni ko‘rish mumkin.
Biz, aka-ukalarning 2001-yildan beri an’anaviy tushadigan fotosuratimiz. 2016 yilgacha davom etib kelyapti, bunday an’anamiz abadiy davom etishini Yaratgandan so‘rab qolamiz.Yoqub Ahmedov, aktyor, rejissor va prodyuser
Bundan avvalroq Yoqub Ahmedov ukasi Odil Ahmedovning Xitoy klubiga o‘tgani haqidagi xabarlar muxlislar turlicha munosabat bildirayotgani munosabati bilan, Instagram’dagi sahifasida qisqacha xabar qoldirgan edi.
Qayerda o‘ynashingdan qat’i nazar, sog‘-salomat yursang bo‘ldi. Bilaman, ayrim muxlislar har xil xayollarga borayapti, lekin ular faoliyating qanchalik mashaqqatli ekanini tasavvur ham qila olmaydi.Yoqub Ahmedov, aktyor, rejissor va prodyuser
Ma’lumot uchun, 2016-yilning 30-dekabr kuni Odil Ahmedov Rossiyaning “Krasnodar” klubidan Xitoyning “Shanxay SIPG” jamoasiga o‘tgani ma’lum bo‘ldi.
Futbolchi professional faoliyatini Toshkentning “Paxtakor” jamoasida boshlagan bo‘lib, 2011-yili Rossiyaning “Anji” klubiga o‘tgan, 2014-yildan “Krasnodar”da o‘ynab kelayotgan edi.
“Kino-teatr.ru” loyihasi ma’lumotlariga ko‘ra, Yoqub Ahmedov kinodagi faoliyatini 2012-yili boshlagan. U “O‘gay ona” (2012), “Sensiz”, “Turist” (2013), “To‘qlikka sho‘xlik 2” (2015) filmlarida suratga tushgan.
Ayni vaqtda, “Turist” filmiga rejissorlik, “Sensiz” va “O‘gay ona” kartinalariga prodyuserlik qilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)