4-yanvar kuni tunda Angliya premyer-ligasi klublari Boxing Day’ni eson-omon yakunlab oldi. Shu bilan ular 14-yanvar sanasiga qadar ta’tilga chiqdi.
Qisqa fursatda o‘tib ketgan tur mutaxassislar tomonidan ko‘p bor tanqid qilindi. Yaqindagina korrupsiya muammolari bilan yurgan Sem Ellardays ham taqvim tuzib chiqqanlarni bir tepib o‘tishni o‘zi uchun lozim topdi.
Yangi yilni futbol bilan qarshi olgan klublardan “Tottenhem” va “Yunayted”ni olqishlash mumkin. Har ikki klub Boxing Day vaqtida 9 ochkodan ishlab oldi. Bunda “shporlar”ning mehnati yanada salmoqli ko‘rinadi. Ular 10 kun ichida 10 ta gol urib, 2 ta gol o‘tkazib yubordi. Raqiblar orasida 13 uchrashuvdan buyon mag‘lub bo‘lmayotgan “Chelsi”ning ham bor ekani ajoyib manzara.
Yevropaning eng ajoyib jamoalaridan birini mag‘lub etdik, shu nuqtai nazardan olib qaraganda g‘alaba salmoqlidir.Futbolda eng muhimi o‘ziga bo‘lgan ishonch. Biz esa harakter ko‘rsata olganimizdan g‘ururlanamiz. Isbotladikki, chempionlik uchun haqlimiz.
Maurisio Pochettino, “Tottenhem” klubi bosh murabbiyi
“Yunayted” bu oraliqda top klublar bilan to‘qnash kelmadi. Shunday bo‘lsa-da, “Midlsbro”ga qarshi o‘yindagi iroda va “Vest Hem” maydonidan g‘alaba bilan qaytish maqtashga arzirli bo‘ldi.
Boxing Day vaqtida uch klub 7 tadan ochko ishlab oldi: “Everton”, “Liverpul” va “Arsenal”. To‘plar nisbatidagi yaxshiroq ko‘rsatkichni shu ketma-ketlikda o‘qish o‘rinli.
Ligada jon saqlab qolish yo‘lida harakat qilayotgan “Xall Siti” va “Sanderlend” jamoalari Liverpul shahri klublarini 2 ochkodan mahrum qila oldi. “Arsenal”ning “Bornmut”ga qarshi o‘yindagi kambekini esa muxlislar uzoq eslab yuradi.
“Chelsi” va “Siti” 10 kun ichida 1 martadan mag‘lub bo‘ldi. Har ikki klub ham markaziy o‘yinlarda imkoniyatni boy berdi. “Siti” “Enfild”da, “Chelsi” esa “Uayt Xart Leyn”da ojiz qoldi. Shunday bo‘lsa-da, ularni maqtash biroz o‘rinsiz. Chunki “Byornli” va “Vest Bromvich” kabi oddiy klublar ham shu 10 kun ichida 6 ochkodan jamg‘ara olgandi.
Mag‘lubiyatdan hafa bo‘ldik, biroq ketma-ket 13 ta uchrashuvda zafar quchganimizdan shodmiz, APLda bu mushkul ish.Raqibimiz kuchli edi. “Tottenhem” o‘tgan mavsum so‘nggi turga qadar oltin medal uchun kurashdi. Pochettino yillar davomida mehnat qildi va APL chempionligi uchun kurasha oladigan ahil kollektivga asos soldi.
Bu mag‘lubiyat sentabr oyidagilaridan farq qiladi. Chunki o‘shanda biz yaxlit bir jamoa emasdik. Hozir esa bir mushtligimizni hamma biladi va bu bizga juda muhim.
Antonio Konte, “Chelsi” klubi bosh murabbiyi
Kutilmagan holat: Boxing Day’da eng rasvo natijani “Sautgempton” futbolchilari qayd etdi va faqatgina ular birorta ham ochko ishlay olmadi.
Boxing Day’ning turnir jadvaliga ta’siri
Kuchli olti klubdan “Tottenhem” jiddiy o‘sishga erishdi: 5 dan 3 ga ko‘tarildi. Qolganlar esa o‘z joyida. Biroq bu olti klub bir-biriga ancha yaqinlashib qoldi. Natijada APLdagi raqobat yana-da jiddiylashdi.
Quyi o‘rinlarda borayotgan jamoalar esa bir qimirlab, yana joyiga qaytib qoldi.
Aybsiz aybdor
Sofian Feguli qizil kartochka olmaganida, “Yunayted” “Vest Hem” maydonidan g‘alaba bilan qayta olarmidi? Aytish qiyin, absurd. O‘tgan ish o‘tib bo‘ldi. Futbolda qo‘l bilan gol urib, jahon chempionatiga chiqqan termalar bor, Fegulining qizil kartochkasi nima bo‘libdi?!
APL esa vaziyatni qaytadan ko‘rib chiqdi va jaozirlik futbolchini aybsiz deb topdi. Bu har qalay haqiqatning qaror topishi — hechdan ko‘ra kech. “Vest Hem” esa yo‘qotilgan ochkolar o‘rnini boshqa o‘yinlar orqali to‘ldirib oladi.
Slaven Bilichga qiyin. Uning alam bilan aytgan fikrlari sizga qiziq bo‘lsa, shu havolaga marhamat qiling!
Haqiqiy aybdor
Fernandinyoning olgan qizil kartochkasi “Siti”ning o‘yiniga ta’sir qilmadi va Gvardiola jamoasi g‘olib chiqdi. Xuddi “Vest Hem” kabi “Siti” ham qizil borasida APLga apellyatsiya berdi.
Javob xati o‘zini ko‘p kuttirmadi: “Toshingizni tering!” Fernandinyo 4 ta o‘yinlik diskvalifikatsiyani o‘taydi.
Ispaniya va Germaniyaning eng kuchli klublarida ishlab, o‘zi uchun kerakli natija qila olgan Xosep Gvardiola Angliya o‘rmonlarida tentirab yurgan Robin Gudni yodga solmoqda. Harakat bor, biroq “Siti” usiz ham hozirgi natijasini ko‘rsata olardi, taxminimizcha.
Bizda “Barselona”, “Bavariya”, “Manchester Yunayted” yoki “Yuventus”nikidek tarix yo‘q. Biz yana o‘n yillar davomida chempionlar ligasida o‘ynashimiz kerak. Bu esa bitta titul yutgandan ko‘ra muhimroq, ishoning.Bu klubda ishlayotgan har bir odam ajoyib ekanini tushuntirishimiz lozim. Xuddi muxlislar kabi.
Xosep Gvardiola, “Manchester Siti” bosh murabbiyi
Oson emas bu maydon ichra turmoq, Pep. Tashrifdan maqsad boshqa edi, xulosa esa tashrif maqsadiga mos emas. Gvardiola haqiqiy futbol qanday ekanini Angliyada ko‘rdi. Hayotda hamma narsani pul hal qilavermaydi. Eslang, “Yunayted” ham uni istagandi, uning o‘zi esa pulni istadi. Mana oqibat.
21-tur
14-yanvar kuni start oladi bu tur va 15-yanvar kungi markaziy o‘yin bilan yakuniga yetadi.14-yanvar, shanba“Tottenhem” — “Vest Bromvich”“Byornli” — “Sautgempton”“Vest Hem” — “Kristal Pelas”“Sanderlend” — “Stok Siti”“Suonsi” — “Arsenal”“Uotford” — “Midlsbro”“Xall Siti” — “Bornmut”“Lester” — “Chelsi”
15-yanvar, yakshanba“Everton” — “Manchester Siti”“Manchester Yunayted” — “Liverpul”
“Chayon zarbasi”
Olivye Jiruning “Kristal Pelas” darvozasiga urgan goli chiroylimi yoki Genrix Mxitaryanning “Sanderlend” postiga yo‘l topishi?
“Daryo” o‘quvchilarining so‘rovnomada ishtirok etgan 58 foizi fransiyalik futbolchiga ovoz berdi. Armanistonlik yigit 42 foiz ovoz to‘pladi.
Ko‘proq ovoz to‘plagan golni yana bir bora tomosha qiling.
Izoh (0)