4 январь куни тунда Англия премьер-лигаси клублари Boxing Day’ни эсон-омон якунлаб олди. Шу билан улар 14 январь санасига қадар таътилга чиқди.
Қисқа фурсатда ўтиб кетган тур мутахассислар томонидан кўп бор танқид қилинди. Яқиндагина коррупция муаммолари билан юрган Сэм Эллардайс ҳам тақвим тузиб чиққанларни бир тепиб ўтишни ўзи учун лозим топди.
Янги йилни футбол билан қарши олган клублардан «Тоттенҳэм» ва «Юнайтед»ни олқишлаш мумкин. Ҳар икки клуб Boxing Day вақтида 9 очкодан ишлаб олди. Бунда «шпорлар»нинг меҳнати янада салмоқли кўринади. Улар 10 кун ичида 10 та гол уриб, 2 та гол ўтказиб юборди. Рақиблар орасида 13 учрашувдан буён мағлуб бўлмаётган «Челси»нинг ҳам бор экани ажойиб манзара.
Европанинг энг ажойиб жамоаларидан бирини мағлуб этдик, шу нуқтаи назардан олиб қараганда ғалаба салмоқлидир.Футболда энг муҳими ўзига бўлган ишонч. Биз эса ҳарактер кўрсата олганимиздан ғурурланамиз. Исботладикки, чемпионлик учун ҳақлимиз.
Маурисио Почеттино, «Тоттенҳэм» клуби бош мураббийи
«Юнайтед» бу оралиқда топ клублар билан тўқнаш келмади. Шундай бўлса-да, «Мидлсбро»га қарши ўйиндаги ирода ва «Вест Ҳэм» майдонидан ғалаба билан қайтиш мақташга арзирли бўлди.
Boxing Day вақтида уч клуб 7 тадан очко ишлаб олди: «Эвертон», «Ливерпуль» ва «Арсенал». Тўплар нисбатидаги яхшироқ кўрсаткични шу кетма-кетликда ўқиш ўринли.
Лигада жон сақлаб қолиш йўлида ҳаракат қилаётган «Халл Сити» ва «Сандерленд» жамоалари Ливерпуль шаҳри клубларини 2 очкодан маҳрум қила олди. «Арсенал»нинг «Борнмут»га қарши ўйиндаги камбэкини эса мухлислар узоқ эслаб юради.
«Челси» ва «Сити» 10 кун ичида 1 мартадан мағлуб бўлди. Ҳар икки клуб ҳам марказий ўйинларда имкониятни бой берди. «Сити» «Энфилд»да, «Челси» эса «Уайт Харт Лэйн»да ожиз қолди. Шундай бўлса-да, уларни мақташ бироз ўринсиз. Чунки «Бёрнли» ва «Вест Бромвич» каби оддий клублар ҳам шу 10 кун ичида 6 очкодан жамғара олганди.
Мағлубиятдан ҳафа бўлдик, бироқ кетма-кет 13 та учрашувда зафар қучганимиздан шодмиз, АПЛда бу мушкул иш.Рақибимиз кучли эди. «Тоттенҳэм» ўтган мавсум сўнгги турга қадар олтин медаль учун курашди. Почеттино йиллар давомида меҳнат қилди ва АПЛ чемпионлиги учун кураша оладиган аҳил коллективга асос солди.
Бу мағлубият сентябрь ойидагиларидан фарқ қилади. Чунки ўшанда биз яхлит бир жамоа эмасдик. Ҳозир эса бир муштлигимизни ҳамма билади ва бу бизга жуда муҳим.
Антонио Конте, «Челси» клуби бош мураббийи
Кутилмаган ҳолат: Boxing Day’да энг расво натижани «Саутгемптон» футболчилари қайд этди ва фақатгина улар бирорта ҳам очко ишлай олмади.
Boxing Day’нинг турнир жадвалига таъсири
Кучли олти клубдан «Тоттенҳэм» жиддий ўсишга эришди: 5 дан 3 га кўтарилди. Қолганлар эса ўз жойида. Бироқ бу олти клуб бир-бирига анча яқинлашиб қолди. Натижада АПЛдаги рақобат яна-да жиддийлашди.
Қуйи ўринларда бораётган жамоалар эса бир қимирлаб, яна жойига қайтиб қолди.
Айбсиз айбдор
Софиан Фегули қизил карточка олмаганида, «Юнайтед» «Вест Ҳэм» майдонидан ғалаба билан қайта олармиди? Айтиш қийин, абсурд. Ўтган иш ўтиб бўлди. Футболда қўл билан гол уриб, жаҳон чемпионатига чиққан термалар бор, Фегулининг қизил карточкаси нима бўлибди?!
АПЛ эса вазиятни қайтадан кўриб чиқди ва жаозирлик футболчини айбсиз деб топди. Бу ҳар қалай ҳақиқатнинг қарор топиши — ҳечдан кўра кеч. «Вест Ҳэм» эса йўқотилган очколар ўрнини бошқа ўйинлар орқали тўлдириб олади.
Славен Биличга қийин. Унинг алам билан айтган фикрлари сизга қизиқ бўлса, шу ҳаволага марҳамат қилинг!
Ҳақиқий айбдор
Фернандиньонинг олган қизил карточкаси «Сити»нинг ўйинига таъсир қилмади ва Гвардиола жамоаси ғолиб чиқди. Худди «Вест Ҳэм» каби «Сити» ҳам қизил борасида АПЛга апелляция берди.
Жавоб хати ўзини кўп куттирмади: «Тошингизни теринг!» Фернандиньо 4 та ўйинлик дисквалификацияни ўтайди.
Испания ва Германиянинг энг кучли клубларида ишлаб, ўзи учун керакли натижа қила олган Хосеп Гвардиола Англия ўрмонларида тентираб юрган Робин Гудни ёдга солмоқда. Ҳаракат бор, бироқ «Сити» усиз ҳам ҳозирги натижасини кўрсата оларди, тахминимизча.
Бизда «Барселона», «Бавария», «Манчестер Юнайтед» ёки «Ювентус»никидек тарих йўқ. Биз яна ўн йиллар давомида чемпионлар лигасида ўйнашимиз керак. Бу эса битта титул ютгандан кўра муҳимроқ, ишонинг.Бу клубда ишлаётган ҳар бир одам ажойиб эканини тушунтиришимиз лозим. Худди мухлислар каби.
Хосеп Гвардиола, «Манчестер Сити» бош мураббийи
Осон эмас бу майдон ичра турмоқ, Пеп. Ташрифдан мақсад бошқа эди, хулоса эса ташриф мақсадига мос эмас. Гвардиола ҳақиқий футбол қандай эканини Англияда кўрди. Ҳаётда ҳамма нарсани пул ҳал қилавермайди. Эсланг, «Юнайтед» ҳам уни истаганди, унинг ўзи эса пулни истади. Мана оқибат.
21-тур
14 январь куни старт олади бу тур ва 15 январь кунги марказий ўйин билан якунига етади.14 январь, шанба«Тоттенҳэм» — «Вест Бромвич»«Бёрнли» — «Саутгемптон»«Вест Ҳэм» — «Кристал Пэлас»«Сандерленд» — «Сток Сити»«Суонси» — «Арсенал»«Уотфорд» — «Мидлсбро»«Халл Сити» — «Борнмут»«Лестер» — «Челси»
15 январь, якшанба«Эвертон» — «Манчестер Сити»«Манчестер Юнайтед» — «Ливерпуль»
«Чаён зарбаси»
Оливье Жирунинг «Кристал Пэлас» дарвозасига урган голи чиройлими ёки Генрих Мхитаряннинг «Сандерленд» постига йўл топиши?
«Дарё» ўқувчиларининг сўровномада иштирок этган 58 фоизи франциялик футболчига овоз берди. Арманистонлик йигит 42 фоиз овоз тўплади.
Кўпроқ овоз тўплаган голни яна бир бора томоша қилинг.
Изоҳ (0)