Tesla Motors kompaniyasi elektrokarlar proshivkasini oxirgi yangilashda bayram munosabati bilan ikkita sovg‘a hozirladi: kompaniyaning operatsion tizimiga chiroqlar shousi va Mars bo‘ylab navigator funksiyalari qo‘shildi, deb yozadi TJournal.
Chiroqlar shousi bilan bog‘liq funksiya faqat Tesla Model X elektrokari egalari uchun mo‘ljallangan. Rejimni ishga tushirish uchun kompaniya logotipini besh soniya bosib turib, so‘ngra Holiday yoki Modelxmas parol so‘zlarini kiritish lozim.
Shundan so‘ng krossover musiqa chalish, eshiklarni ochish va chiroqlarni o‘chirib-yoqishni boshlaydi. Chiroqlar Trans-Siberian Orchestra guruhining Wizards in Winter qo‘shig‘iga hamohang miltillaydi.
Ikkinchi maxfiy funksiya Model X va Model S elektrokarlari sohiblari uchun mo‘ljallangan. Uni ishga tushirish uchun navigatorni ochish, Tesla logotipini besh soniya bosib turish, so‘ngra paydo bo‘lgan oynachaga Mars so‘zini yozish kerak bo‘ladi. Shundan so‘ng mahalliy xarita Mars landshaftiga o‘zgaradi, elektrokar piktogrammasi o‘rniga esa chizilgan marsoxod paydo bo‘ladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)