Yaponiya hukumati 11-avgust kuni mamlakat janubi-g‘arbida kuchli yomg‘irlar oqibatida yuzaga kelgan suv toshqinlari va ko‘chkilar sababli uch million aholiga uylarini tark etish chaqirig‘i bilan murojaat qildi. Tabiiy ofatlar natijasida bir necha kishi bedarak yo‘qolgan.
Mahalliy telekanallar Kumamoto prefekturasida suvning balandligi taxminan bir metrga yetib, turar joy binolari, do‘konlar va avtomobillarni suv bosganini ko‘rsatuvchi tasvirlarni namoyish etgan.
Yaponiya meteorologiya agentligi ma’lumotiga ko‘ra, dushanba kuni ertalabki olti soat ichida eng ko‘p zarar ko‘rgan Tamana shahrida 37 santimetrdan ortiq yog‘in yoqqan. Bu ushbu hudud uchun yangi rekord hisoblanadi. Meteorologlar vaziyatning hayot uchun o‘ta xavfli ekanligini ta’kidlab, zudlik bilan xavfsizlik choralarini ko‘rishni talab qildi va aholini nihoyatda hushyor bo‘lishga chaqirdi.
Asosan ushbu prefekturada yashovchi 384 mingga yaqin aholi uchun Yaponiyaning Yong‘in va tabiiy ofatlarga qarshi kurash agentligi tomonidan eng yuqori darajadagi ogohlantirish e’lon qilingan Kumamoto shahriga alohida e’tibor qaratilgan.
Kosa shahrida bir erkak uyiga ko‘chki tushganidan so‘ng bedarak yo‘qolgan. Misato shahrida qutqaruvchilar ko‘chki natijasida zarar ko‘rgan uyda qamalib qolgan keksa erkakka yordam berishga urinmoqda. Bundan tashqari, yirik Fukuoka shahrining ikki fuqarosi yakshanba kuni daryoda oqib ketgan va hozirgacha bedarak yo‘qolgan deb hisoblanmoqda.
Izoh (0)