Toshkentdagi Labzak ko‘chasining “Anhor-Lokomotiv” parki oldidan o‘tgan, Zulfiyaxonim va Abdulla Qodiriy ko‘chalari oralig‘idagi qismi yopilgan. Bu haqda Facebook’dagi “Voditeli Tashkenta” guruhida xabarlar qoldirilgan.
Xabar berishlaricha, Labzak ko‘chasining Zulfiyaxonim va Abdulla Qodiriy ko‘chalari oralig‘idagi qismi to‘liq yopilgan. Haydovchilarning ma’lum qilishicha, katta ehtimol bilan, yo‘l Yangi yil tantanalaridan keyin ochilishi mumkin.
Ayni vaqtda, Labzakka qo‘shni ko‘chalar va yaqin chorrahalarda tirbandliklar kuzatilayotgani haqida xabarlar qoldirilmoqda. Xususan, Abay va Abdulla Qodiriy, Abay va Navoiy ko‘chalari kesishgan chorrahalarda katta tirbandliklar yuzaga kelgan.
Foydalanuvchilarning qo‘shimcha qilishicha, nafaqat “Anhor-Lokomotiv” parki yaqinidagi yo‘l, balki bayram archalari o‘rnatilgan boshqa maydon va xiyobonlar yaqinidagi, xususan, ROISON zavodi oldiga o‘rnatilgan archa oldidagi yo‘l ham yopilgan, haydovchilar aylanib o‘tishga majbur bo‘lmoqda.
Ma’lumot uchun, Toshkentda 2017-yil kirib kelishiga bag‘ishlangan asosiy Yangi yil tantanalari bo‘ladigan joy Mustaqillik maydonidan “Anhor-Lokomotiv” parkiga ko‘chirilgan edi. Qayd etish joiz, Yangi yil tantanalari Mustaqillik maydonida o‘tkazilgan yillarda maydon oldidan o‘tgan Rashidov ko‘chasining bir qismi transport harakati uchun yopilar edi.
Toshkent shahridagi maydon va xiyobonlarda 27-dekabrdan Yangi yil tomoshalari boshlandi. E’tiborli tomoni, Toshkent shahar hokimligi bayram sayllari vaqtida shaharning ba’zi ko‘chalari yopilishi haqida oldindan ogohlantirish bermagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)