Hindiston harbiy-havo kuchlari yangi samolyotlarga ehtiyoj sezmoqda. Hindlar beshinchi avlodga mansub Rossiyaning Su-57 va AQSHning F-35 samolyotlarini xarid qilishni rejalashtirmoqda. Bu haqda Meduza nashri xabar berdi.
Manbaga ko‘ra, hindlar katta miqdorda harbiy uchoqlar sotib olmoqchi emas. Mamlakat 2035-yildan boshlab o‘zining AMCA nomli samolyotini ishlab chiqarishni boshlaydi. Biroq shunga qadar havo kuchlariga zaruriy uchoqlar sotib olinadi.
Qayd etilishicha, Hindiston hukumati Rossiya va AQSH bilan harbiy uchoqlar borasida hali hech qanday rasmiy muzokaralar boshlamagan.
Hindiston harbiy-havo kuchlari (HHK) tarkibida ikkita eskadron Rossiya ishlab chiqargan MiG-21 samolyotlari (taxminan 30 ta) mavjud. Biroq ular 2025-yil sentyabrida foydalanishdan chiqariladi. Shundan so‘ng, Hindistonda 29 ta eskadron qoladi — bu mamlakat harbiy-havo kuchlari tarixidagi eng kam ko‘rsatkich bo‘ladi.
Samolyotlar yetishmovchiligi muammosini hal qilish uchun hind harbiylari qo‘shimcha fransuz Rafale qiruvchi samolyotlarini xarid qilish imkoniyatini ham ko‘rib chiqmoqda.
Umuman olganda, Hindiston 114 ta Rafale qiruvchi samolyotlarini qo‘lga kiritishni rejalashtirmoqda, ularning katta qismi mamlakat hududida yig‘ilishi kerak. Aynan shu samolyotlar yaqinda Hindiston va Pokiston o‘rtasidagi mojaroda faol ishlatilgan. Pokiston Hindiston HHKning olti harbiy samolyotni, jumladan Rafaleni urib tushirganini da’vo qilgan. Hind tomoni esa bu xabarlarni yolg‘on deb atagan.
Bloomberg agentligining iyul oyida bergan xabariga ko‘ra, AQSH prezidenti Donald Tramp 2025-yilning fevralida Vashingtonga tashrif buyurgan Hindiston bosh vaziri Narendra Modiga F-35 samolyotlarini sotish bo‘yicha kelishuv taklif qilgan. Biroq Hindiston tomoni bu taklifni rad etgan. Ular mudofaa qurollarini mamlakat ichida ishlab chiqarishga qiziqayotganlarini bildirgan.
Izoh (0)