Yangi yil bayramini ko‘p xarajat qilmasdan nishonlash mumkinmi?

Bayram arafasi hammamiz uchun juda quvonchli va yoqimli bo‘ladi. Shohona dasturxon yasatib mehmon kutasiz, yaqinlaringizga sovg‘alar ulashasiz. Lekin, ba’zan bayramdan keyingi oila byudjetining hisob-kitoblar natijasini ko‘rib kayfiyatingiz tushib ketadi. Axir hali maoshgacha ancha yashashingiz kerak-ku!

Xo‘sh, bayramni qanday qilib ko‘p xarajatsiz va yaxshi o‘tkazish mumkin?

Reja – iqtisod asosi

Odatda Yangi yil bayrami uchun qilinadigan asosiy xarajat turlari uch qismdan iborat bo‘ladi: sovg‘alar, oziq-ovqat mahsulotlari, o‘yin-kulgi. Oldindan Yangi yilni kimlar bilan kutib olishingizni, kimlarga sovg‘a bermoqchi ekanligingizni taxminan bo‘lsa ham yozib chiqing. Menyu tuzing va bu ovqatlar uchun qanday mahsulotlar kerakligini, taxminiy narxlarini yozing va oxirida hammasini jamlang. Oilaviy byudjetingiz qoldig‘iga qarab rejalashtiravering.

Oldindan sotib oling

Oldindan rejalashtirishda ikki maqsad ko‘zlanadi. Birinchidan, shoshilib qolishga va noto‘g‘ri qaror qabul qilishga yo‘l qo‘ymaydi. Ikkinchidan, xarajatni ancha kamaytirishga yordam beradi. Shuning uchun, sovg‘alarni sotib olishni keyinga qoldirmang.

An’analar me’yorida bo‘lgani yaxshi

Agar ovqatlarni tanlashga e’tibor bilan yondashsangiz, isrofgarchilikning oldini olish maqsadida ham oziq-ovqat mahsulotlariga ketadigan xarajatlarni ancha kamaytirish mumkin. Dasturxonni faqat tansiq taomlar bilan to‘ldirish shart emas. Ko‘pchilik uy bekalari arzon mahsulotlardan ham shirin va ajoyib taomlar tayyorlay olishadi.

Yaqinlaringiz uchun qo‘lbola sovg‘alar

Qaysidir sovg‘alarni imkoni boricha o‘zingiz qo‘lda qilishni o‘ylab ko‘ring. Masalan, yumshoq o‘yinchoq tikish; shapka, bo‘yinbog‘, qo‘lqop to‘qish; bilaguzuk yasash va boshqalar.