Hamkasblar bilan uyushtiriladigan Yangi yil bayramiga qanday libos kiyish mumkin?

Har yili hamkasblar doirasida tashkil qilinadigan bayram kechasiga nima kiyish to‘g‘risida oldindan tashvishga tushamiz. Siz uchun yilning asosiy kechasiga mos ravishda kiyinishning universal qoidalarini to‘pladik.

1-qoida

Ko‘pchilik kompaniyalar mavzuli kechalarni aniq belgilangan dress-kodga rioya qilgan holda o‘tkazishni ma’qul ko‘rishadi. Shuning uchun, siz masalan, qora ko‘ylak ustidan oq kardigan yoki och rangdagi kofta va qora yubka kiyishingiz mumkin. Shuningdek, kelayotgan xo‘roz yilini esdan chiqarmagan holda, taqinchoqlaringizning birortasi yorqin qizil rangda bo‘lsa, maqsadga muvofiq bo‘lar edi.

2-qoida

O‘tkaziladigan tadbirning joyini aniqlasangiz, kechaga qanday kiyinish masalasi o‘z yechimini topadi. Masalan, kartodromda o‘tkaziladigan “Yangil yil poygalari”ga kechalik uzun libosda borish unchalik to‘g‘ri kelmaydi.

3-qoida

O‘zingizni noqulay his qiladigan ko‘ylak yoki liboslarni kiymaganingiz ma’qul. Taassurot qoldiradigan va o‘ziga xoslikka urg‘u beradigan qiyofa tanlashga harakat qiling. Me’yoridan oshirib yubormang, chunki, boshliqlar xodimlar o‘zlarini qanday tutishlariga alohida e’tibor berishadi.

4-qoida

Ko‘rinishingizga bayramona tus berish maqsadida, qor uchquni yoki shokila shaklidagi ziraklar taqishingiz mumkin. Qo‘lingizga esa bilaguzuk sifatida mohirlik bilan o‘ralgan oddiy zar ip taqsangiz ham bo‘ladi.