Xitoyning “Shanxay SIPG” klubi bilan shartnoma imzolagan braziliyalik Oskar Premyer-Liga klublari hisob raqamini boyitgan eng qimmat to‘rtinchi futbolchiga aylandi.
Hozirga qadar eng qimmat bo‘lib turgan uch transferning 2 tasi Madridning “Real” klubi bilan bog‘liq bo‘lsa, yana 1 tasi “Barselona”ga tegishli edi.
“Real” Londonning “Tottenhem” klubidan Garet Beylni sotib olish uchun 85,3 million funt chiqim qilgan. Bu Angliya klubidan boshqa klub safiga o‘tib ketgan futbolchilar orasida rekord ko‘rsatkich hisoblanadi.
Bu borada 2-o‘rin ham “Real”ning o‘ziga tegishli. Garet Beyldan oldinroq Madrid klubi Krishtianu Ronalduni sotib olish uchun “Manchester Yunayted” hisob raqamiga 80 million funt o‘tkazib bergan. “Liverpul” a’zosi hisoblangan Luis Suares esa “Barselona” uchun 65 million funtga tushgan.
“Shanxay SIPG” Oskarni “Chelsi”dan sotib olish uchun 60 million funt xarajat qildi. Qo‘shimchasiga futbolchining haftalik maoshini 400 ming funt etib belgiladi. Bu bilan Oskar Xitoy klubidan har daqiqada 40 funt olib turadigan bo‘ldi.
Izoh (0)