Joriy yil 1-avgust kuni Buyuk Britaniyada Tom Holland bosh rolni ijro etayotgan “O‘rgimchak odam: Yangi kun” filmining suratga olish ishlariga start berildi. Premyera 2026-yil 31-iyulga belgilangan. Ushbu loyiha Marvel studiyasi tomonidan yaqin 12 oy ichida katta ekranlarga chiqadigan yagona blokbaster bo‘ladi.
Filmni suratga olish ishlari Glazgouda boshlandi. Bu joy filmda Nyu York shahri sifatida ko‘rsatiladi. Ochiq maydonlardagi tasvirga olish ishlari avgust o‘rtalarigacha davom etadi. Shundan so‘ng suratga olish guruhi yopiq pavilyonlarga ko‘chadi. Bu haqda taniqli insayder Deniyel Rixtman xabar berdi. Uning ma’lumotiga ko‘ra, birinchi ish kunidayoq yirik jang sahnasini olish rejalashtirilgan. Unda O‘rgimchak odam va Jazolovchi (Punisher) yuk mashinalari korteji uchun kurash olib boradi.
Filmning ilk tizeri
GQ’ning Britaniyadagi nashriga bergan intervyusida Tom Holland suratga olish ishlarga allaqachon tayyorlanayotganini va studiyada kaskadyorlik harakatlarini mashq qilayotganini aytdi. Shuningdek, u 2027-yilda qisqa ijodiy tanaffus olishi mumkinligini qo‘shimcha qildi:
“2026-yilda men juda band bo‘laman. Shu bois, 2027-yilda bir oz dam olishni rejalashtirganman. Ko‘ramiz, barchasiga vaqt hakam”, dedi aktyor.
Filmning syujeti hozircha sir saqlanmoqda. Biroq insayderlarga ko‘ra, unda bir nechta salbiy qahramonlar, jumladan, “Yangi kun” (Brand New Day) komikslar seriyasidan janob Negativ (Mr. Negative) paydo bo‘ladi. Shuningdek, “Juda g‘alati ishlar” (Stranger Things) seriali yulduzi Sedi Sink ham filmda ishtirok etadi. Ammo u qaysi obrazni gavdalantirishi hozircha oshkor etilmagan.
Izoh (0)