Armaniston hukumati 3-avgust kuni Yerevandagi Respublika stadionida bo‘lib o‘tadigan Jennifer Lopes konserti uchun 7 million dollar ajratdi.
Yerevan vitse-meri Armen Pambuxchyan xonanda Lopesning konsert berishiga o‘z munosabatini bildirdi va Armaniston poytaxtida bo‘lib katta shou uchun sarflangan xarajatlar o‘zini to‘liq oqlashini ma’lum qildi. Uning bayonoti “Sputnik Armeniya” nashrida berildi.
Pambuxchyanning aytishicha, 56 yoshli xonandaning konsertiga taxminan 15 ming nafar xorijlik muxlislar kelishi kutilmoqda va ularning aksariyati bir muddat Yerevanda bo‘ladi.
“Sayyohlarning o‘rtacha xarajatlarini hisoblab chiqaylik: chipta, yashash, ovqatlanish va hordiqni hisobga olsak, har bir mehmon mamlakat iqtisodiyotiga kamida 500 dollar keltiradi. Mazkur konsert global auditoriya orasida Armaniston imiji va obro‘sini ko‘tarishda ham alohida o‘rin tutadi”, dedi Pambuxchyan
“15 000 × 500 = 7 500 000. Xush kelibsan, Jey Lo. Ishonamizki, Armanistondan katta taassurotlar bilan ketasan”, deya ta’kidladi u.
Avvalroq Jennifer Lopes o‘nlab mamlakatlarni qamrab oladigan Up All Night: Live in 2025 katta konsert turini eʼlon qilgani, ular orasida birinchi marta O‘zbekiston ham borligi haqida xabar berilgandi. Shou dasturi 7-avgust kuni Toshkentdagi “Bunyodkor” stadionida bo‘lib o‘tadi.
Jennifer Lopesning o‘nlab mamlakatlarni qamrab oladigan Up All Night: Live in 2025 katta konsert turi AQSH, Yevropa, Osiyo, jumladan, Qozog‘iston, Armaniston va O‘zbekistonda bo‘lib o‘tadi.
Ma’lumot uchun: Jennifer Lopes 1969-yil 24-iyul Nyu York shahrida dunyoga kelgan amerikalik aktrisa, qo‘shiqchi, raqqosa, modelyer, prodyuser va ishbilarmon ayol. U birinchi marta 1991-yilda In Living Color teleko‘rsatuvida Fly Girl raqqosasi sifatida mashhurlikka erishgan. U 1993-yilgacha aktrisalik faoliyatini boshlashga qaror qilgunga qadar jamoaning doimiy aʼzosi bo‘lib qolgan. Lopes o‘zining birinchi bosh rolini 1997-yilda qo‘shiqchi Selena haqidagi biografik filmda ijro etgan. Bu rol unga “Oltin globus” nominatsiyasini olib kelgan.
Izoh (0)