Airbus Eronga 100 ta samolyot yetkazib berilishini tasdiqladi

Fransiyaning Airbus konserni Eronning Iran Air aviakompaniyasi bilan 100 ta samolyot yetkazib berish yuzasidan kelishuv imzolanganini tasdiqladi. Bu haqdagi xabar 22-dekabr, payshanba kuni kompaniya saytiga joylashtirildi, deya ma’lum qiladi “TASS”.

“Iran Air va Airbus 100 ta samolyot yetkazib berish bo‘yicha yakuniy bitimni imzoladi va 2016-yil yanvarida Parijda tuzilgan dastlabki kelishuvni tasdiqladi”, — deyiladi kompaniya press-relizida.

Mazkur hujjatga ko‘ra, Eron aviatashuvchisi 46 ta A320, 38 ta A330 va 16 ta keng fyuzelyajli A350 XWB samolyotini oladi. Dastlabki havo kemalari 2017-yil boshida yetkazib berilishi rejalashtirilgan.

Ma’lumot uchun, yanvar oyida Eron prezidenti Hasan Ruhoniyning Fransiyaga tashrifi chog‘ida Airbus bilan Tehronga 118 ta samolyot yetkazib berish bo‘yicha summasi 27 milliard dollar bo‘lgan kelishuv imzolangandi.