Airbus Эронга 100 та самолёт етказиб берилишини тасдиқлади

Франциянинг Airbus концерни Эроннинг Iran Air авиакомпанияси билан 100 та самолёт етказиб бериш юзасидан келишув имзоланганини тасдиқлади. Бу ҳақдаги хабар 22 декабрь, пайшанба куни компания сайтига жойлаштирилди, дея маълум қилади «ТАСС».

«Iran Air ва Airbus 100 та самолёт етказиб бериш бўйича якуний битимни имзолади ва 2016 йил январида Парижда тузилган дастлабки келишувни тасдиқлади», — дейилади компания пресс-релизида.

Мазкур ҳужжатга кўра, Эрон авиаташувчиси 46 та A320, 38 та A330 ва 16 та кенг фюзеляжли A350 XWB самолётини олади. Дастлабки ҳаво кемалари 2017 йил бошида етказиб берилиши режалаштирилган.

Маълумот учун, январь ойида Эрон президенти Ҳасан Руҳонийнинг Францияга ташрифи чоғида Airbus билан Теҳронга 118 та самолёт етказиб бериш бўйича суммаси 27 миллиард доллар бўлган келишув имзоланганди.