Xitoy Super Ligasi ishtirokchisi hisoblangan “Shanxay Shenxua” klubi o‘z safiga argentinalik Karlos Tevesni qo‘shib oldi. Daily Mail xabariga ko‘ra, 32 yoshli hujumchi yangi klubida haftasiga 763,5 ming dollar maosh oladi.
Bu raqamlar Karlos Tevesni eng katta maosh oladigan futbolchiga aylantirdi. Xitoyning boshqa bir klubi “Xebey Chayna Forchun” Esyekel Lavessi uchun haftasiga 620 ming dollar to‘layotgan bo‘lib, Tevesga qadar argentinalik bu hujumchi eng katta maoshli futbolchi bo‘lib turgandi.
Solishtirish uchun, Madridning “Real” klubi Krishtianu Ronaldu uchun haftasiga 460 ming dollar beradi.
Karlos Teves Argentina chempionatining 14-turida maydonga tushib, muxlislar bilan xayrlashdi. Shu onda tribunadan yugurib chiqqan bir muxlis Tevesning oldida tiz cho‘kib, uning “Boka Xuniors”dan ketmasligini o‘tinib so‘ragan. Xitoydagi har bir daqiqasida 75 dollar topadigan Teves esa fikridan qaytmagan.
“Boka Xuniors” tarbiyalanuvchisi bo‘lgan Karlos Teves Yevropadagi faoliyatidan keyin 2015-yil o‘zi uchun qadrdon jamoaga qaytib kelgandi. U o‘z vaqtida Angliyaning “Vest Hem”, “Manchester Yunayted”, “Manchester Siti”, Italiyaning “Yuventus” klublari safida harakat qilgan.
Teves Argentina milliy terma jamoasiga ilk bor 2004-yil chaqirilgan bo‘lib, o‘tgan davr mobaynida 76 uchrashuv o‘tkazdi va 13 ta gol urdi. U 2004-yil Afinada bo‘lib o‘tgan Olimpiada o‘yinlarida Argentinaning chempion bo‘lishiga hissa qo‘shdi. Milliy terma jamoa bilan 2005, 2007 va 2015-yilgi mavsumlarda Kopa Amerika finaliga qadar yetib bordi.
Ma’lumot uchun, Xitoy klublaridan biri Lionel Messiga soliqlardan tashqari yiliga sof 100 million yevro va’da qilgandi. Solishtirish uchun, jahonning eng serdaromad futbolchisi bo‘lgan Karlos Tevesning yillik maoshi 40 million dollarga biroz yetmaydi. Messidan keyin esa Xitoy hukumatining o‘zi Zlatan Ibrahimovichga yiliga 120 million yevro taklif qilgandi.
Izoh (0)