7-avgustda Toshkentda konsert berishni rejalashtirayotgan amerikalik qo‘shiqchi va aktrisa Jennifer Lopes Uzreport telekanaliga intervyu berdi. U ushbu intervyuda O‘zbekistonga oldin ham bir necha marta kelgani haqida so‘zlab berdi.
““Men avval Toshkentda bir necha marta tug‘ilgan kun va to‘ylarda kuylaganman, shuning uchun u yerga qaytishdan xursandman. Hech qachon katta shou qilmaganman, shuning uchun Markaziy Osiyo bo‘ylab safar qilayotganimizda, “Albatta, Toshkentga borishimiz kerak,” deb o‘yladim. U yerdagi odamlarni ko‘rish va birinchi marta katta tomosha qo‘yish menga katta hayajon bag‘ishlayapti,” dedi Jennifer Lopes.
Toshkentda sizni ko‘plab muxlislar kutmoqda. Siz ular uchun qanday sovg‘alar tayyorlab qo‘ygansiz, deya berilgan savolga Jennifer quyidagicha javob berdi.
“Konsertda ko‘plab mashhur xitlarimni ijro etaman, lekin bu gastrolda yangi qo‘shiqlarni ham taqdim etaman — yaqinda chiqarilgan Birthday hamda boshqa yangi qo‘shiqlar bor. Shuningdek, ozgina ispancha qo‘shiqlarni ham kuylayman, chunki ilgari hech qachon gastrollarda bunday ijro qilmaganman. Muxlislarimning sevimli qo‘shiqlari — masalan, Ain’t It Funny va Play kabi qo‘shiqlarni ham eshitish imkoniyati bo‘ladi. Uzoq vaqt davomida ular so‘ragan narsalarni berishga harakat qilaman,” deya ta’kidladi u.
Xonanda dunyo mamlakatlari bo‘ylab uyushtirilgan gastrol safarlaridan qanday taassurotda ekanligi haqidagi savolga ham javob berdi.
“Har bir tur bir-biridan farq qiladi. Necha marta chiqish qilganimdan qat’i nazar, har bir shou men uchun qadrli. Yaqinda Free deb nomlangan yangi qo‘shiq yozdim. Bu qo‘shiq shouning barcha hissiy mohiyatini ifodalaydi: tun bo‘yi uxlamaslik, erkinlik, hayotni nishonlash, o‘zligimizni bayon qilish va ajoyib vaqt o‘tkazish. Menga aynan shu g‘oya yoqadi. O‘zimni erkin his qilish, tun bo‘yi zavqlanish va hozirgi lahzani qadrlash men uchun qiziqarli. Ana shu ruhda gastrol qilaman.” dedi Jennifer Lopes.
Markaziy Osiyodagi birinchi gastrol haqidagi fikrlar
Jennifer Lopes Markaziy Osiyo davlatlari, xususan Toshkentdagi konserti oldidan hayajonda ekanligini ham yashirmadi.
“Bu mintaqadagi birinchi gastrolim, shuning uchun juda hayajonlanayapman. Avval Toshkentda shaxsiy konsertlarim bo‘lgan, ular menga doim yoqqan. Odamlarni yaxshi ko‘raman, shuning uchun bu safar tomoshabinlar bilan chinakam tanishish imkoniyati meni quvontiradi”, deydi Jennifer.
Hayotdagi asosiy qadriyatlar
Jennifer Lopez sahna ortida unga kim ilhom va kuch berishi haqida gapirdi.
“Bilasizmi, men avvalo onaman. Ikki farzandim bor. Ular hozir katta bo‘lib, o‘rta maktabning oxirgi sinfiga o‘tish arafasida. Men qilayotgan barcha ishlarim, hayotim ularning tarbiyasi va kelajakdagi hayotlariga yo‘naltirilgan. Ular mening ilhom manbaim va doimo qalbimda nur va muhabbat bilan yashaydi”, deydi u.
Xonanda insonning “Sevgan ishini sevimli insonlari bilan birgalikda qilishi” o‘ta muhim ekanligini aytadi.
“Men odamlarni aynan o‘zlari bo‘lishga, erkinlikni his qilishga va sevimli insonlari bilan o‘zlari yoqtirgan ishni qilishga undashni xohlayman. Konsertlarimda ham shu haqda gapiraman — sevgan insonlaringiz bilan hayotingizdagi eng sevimli ishni bajarish haqida. Agar buni amalga oshirsangiz, haqiqatan ajoyib hayot kechirishingiz mumkin. Shu sababli, umid qilamanki, men boshqalarni o‘zligini topishga va baxtli bo‘lishga ilhomlantiraman” dedi u.
Kichik orzular va kelajak rejalari
Chetdan qaraganda hech qanday armoni yo‘qdek tuyuladigan xonanda aslida uning ham hozircha ushalmagan orzulari borligini aytadi.
“Hayotimizning turli davrlarida turli orzular paydo bo‘ladi. Men uzoq vaqtdan beri san’at bilan shug‘ullanaman va bu mening orzuimning amalga oshishi. Ammo shu bilan birga hayotimni biroz sekinlashtirishni, ko‘proq zavqlanishni, masalan, kunduzi qahvaxonada bemalol o‘tirishni orzu qilaman. Men odamlar hayotini kuzatishni yaxshi ko‘raman. Ishga ketayotganimda, “Kunning o‘rtasida qahvaxonada o‘tirgan bu odamlar kim?” deb o‘ylayman. Bir kun kelib, men ham shunday hayot kechirishni istayman. Bu kichik narsalar, ammo hayot tarzi va qanday yashashni xohlayotganingiz haqida, dedi Jennifer Lopes.
Jahon yulduzi Jennifer Lopesga suhbat yakunida O‘zbekistondan kichik sovg‘a topshirildi. Bu qo‘lda tikilgan va juda chiroyli milliy to‘n edi.
“Buni hoziroq kiyib olaman, rangi menga juda yoqdi”, dedi u.
“Salom, O‘zbekiston. Keyingi manzil — Toshkent. Tayyorlaning, men yo‘lga chiqyapman. Tez orada ko‘rishamiz.”, deya suhbatni yakunladi Jennifer.
Izoh (0)