Хитой Супер Лигаси иштирокчиси ҳисобланган «Шанхай Шенхуа» клуби ўз сафига аргентиналик Карлос Тевесни қўшиб олди. Daily Mail хабарига кўра, 32 ёшли ҳужумчи янги клубида ҳафтасига 763,5 минг доллар маош олади.
Бу рақамлар Карлос Тевесни энг катта маош оладиган футболчига айлантирди. Хитойнинг бошқа бир клуби «Хебей Чайна Форчун» Эсьекел Лавесси учун ҳафтасига 620 минг доллар тўлаётган бўлиб, Тевесга қадар аргентиналик бу ҳужумчи энг катта маошли футболчи бўлиб турганди.
Солиштириш учун, Мадриднинг «Реал» клуби Криштиану Роналду учун ҳафтасига 460 минг доллар беради.
Карлос Тевес Аргентина чемпионатининг 14-турида майдонга тушиб, мухлислар билан хайрлашди. Шу онда трибунадан югуриб чиққан бир мухлис Тевеснинг олдида тиз чўкиб, унинг «Бока Хуниорс»дан кетмаслигини ўтиниб сўраган. Хитойдаги ҳар бир дақиқасида 75 доллар топадиган Тевес эса фикридан қайтмаган.
«Бока Хуниорс» тарбияланувчиси бўлган Карлос Тевес Европадаги фаолиятидан кейин 2015 йил ўзи учун қадрдон жамоага қайтиб келганди. У ўз вақтида Англиянинг «Вест Ҳэм», «Манчестер Юнайтед», «Манчестер Сити», Италиянинг «Ювентус» клублари сафида ҳаракат қилган.
Тевес Аргентина миллий терма жамоасига илк бор 2004 йил чақирилган бўлиб, ўтган давр мобайнида 76 учрашув ўтказди ва 13 та гол урди. У 2004 йил Афинада бўлиб ўтган Олимпиада ўйинларида Аргентинанинг чемпион бўлишига ҳисса қўшди. Миллий терма жамоа билан 2005, 2007 ва 2015 йилги мавсумларда Копа Америка финалига қадар етиб борди.
Маълумот учун, Хитой клубларидан бири Лионель Мессига солиқлардан ташқари йилига соф 100 миллион евро ваъда қилганди. Солиштириш учун, жаҳоннинг энг сердаромад футболчиси бўлган Карлос Тевеснинг йиллик маоши 40 миллион долларга бироз етмайди. Мессидан кейин эса Хитой ҳукуматининг ўзи Златан Ибраҳимовичга йилига 120 миллион евро таклиф қилганди.
Изоҳ (0)