AQSH prezidenti Donald Tramp ikkita atom suvosti kemasi “Rossiya yaqinidagi kerakli hududga” yetib kelganini aytdi. Bu haqda Deutsche Welle xabar berdi.
Men allaqachon bu bo‘yicha bayonot berganman va javob shunday: ular hozirda mavjud bo‘lishi kerak bo‘lgan joyda, degan Tramp.
U shu tariqa jurnalistning suvosti kemalari yetib kelgan-kelmagani haqidagi savoliga javob berdi. Siyosatchi kemalar aynan qayerda ekaniga aniqlik kiritmagan. Biroq ular “Rossiyaga yaqin” hududda joylashtirilgani ma’lum.
1-avgust kuni AQSH prezidenti Rossiya Xavfsizlik kengashi rais o‘rinbosari Dmitriy Medvedevning bayonotlaridan so‘ng ikkita atom suvosti kemasini “tegishli hududlarga” yuborish to‘g‘risida buyruq berdi.
Medvedevning tahdidi
Dmitriy Medvedev o‘z bayonotlari bilan G‘arbga bir necha bor tahdid solgan. U qurolli to‘qnashuv kuchayishi, hatto yadro qurolidan foydalanish ehtimoli haqida ochiq gapirgan. Shuningdek, Ukrainani qo‘llab-quvvatlayotgan mamlakatlarga nisbatan ham urush bilan qo‘rqitgan.
Siyosatchi 28-iyul kuni AQSH prezidentining Rossiya bilan olib borayotgan “ultimatum o‘yini” ikki davlat o‘rtasida urushga olib kelishi mumkinligini aytgan. U bu fikrni Trampning Rossiyaga Ukrainadagi urushni 8-avgustgacha tugatish bo‘yicha muhlat bergani munosabati bilan bildirgan.
Tramp esa bu tahdidni jiddiy qabul qilganini ta’kidlagan. Shu sababli ikkita atom suvosti kemasini Rossiya yaqiniga harakatlantirishga buyruq bergan.
Hozirda Rossiyaning muhim institutlaridan birini boshqarayotgan Rossiya sobiq prezidenti — Xavfsizlik kengashi rais o‘rinbosari — yadro energetikasi haqida juda xavotirli gaplarni aytdi. “Yadroviy” degan so‘z tilga olinganda, men doim ehtiyotkor bo‘laman. Shu sababli men mintaqaga ikkita atom suvosti kemasini yubordim. Men shunchaki u aytgan gaplar bayonot darajasidan nariga o‘tmasligiga ishonch hosil qilmoqchiman, degan edi Tramp.
AQSH va Rossiyaning yadroviy qudrati qanday?
2025-yilga kelib, AQSH Harbiy-dengiz kuchlari tarkibida 71 ta atom suvosti kemasi mavjud bo‘lib, bu ularni dunyodagi eng yirik suvosti kuchlariga aylantiradi. Tarkib quyidagilardan iborat:
- 14 ta “Ogayo” sinfidagi ballistik raketali suvosti kemasi — yadro hujumi uchun mo‘ljallangan;
- 4 ta “Ogayo” sinfi asosida qayta qurilgan raketali kemalar — “Tomahawk” qanotli raketalari bilan qurollangan, zarba yoki maxsus operatsiyalar uchun ishlatiladi;
- Taxminan 53 ta tez harakatlanuvchi ko‘p maqsadli suvosti kemalari — razvedka, dushman suvosti kemalariga qarshi kurash va raketa hujumlarini qo‘llab-quvvatlash uchun xizmat qiladi.
Taqqoslash uchun, Rossiya harbiy-dengiz flotida 30 tadan kam atom suvosti kemasi bor. Shulardan taxminan 10 tasi strategik suvosti raketa tashuvchilari hisoblanadi. Ularga zamonaviy “Borey” sinfi va eski modellar kiradi. Bu kemalar “Bulava” ballistik raketalari bilan qurollangan.
AQSH va Rossiya birgalikda butun dunyo yadroviy qurollarining 87 foiziga egalik qiladi. Ular jahon bo‘yicha jangovar holatda bo‘lgan yoki jangga tayyor yadroviy kallaklarning 83 foizini nazorat qiladi.
Izoh (0)