Tesla Norvegiyada qo‘zg‘alish tezligidan norozi Model S P85D elektromobillarining 126 nafar egasi bilan kelishuvga erishdi. Ularning advokati Oslo okrug sudiga AQSh kompaniyasiga nisbatan da’volar qaytarib olinishi haqidagi jamoaviy xatni topshirdi. Bu haqda “Interfaks” xabar bermoqda.
Norvegiyaning Dagens Naeringsliv gazetasiga ko‘ra, Tesla har bir norozi mijozga 65 ming krona (7,7 ming dollar) to‘lashga rozi bo‘ldi. Avtomobil egalari 129,7 ming krona tovon puli talab qilgandi. Shuningdek, Tesla mijozlarga turli bonuslar, jumladan, imtiyozli kredit yoki mashina tyuningining turli ko‘rinishlarini ham taqdim etdi.
Norvegiyalik mijozlar Tesla’ga nisbatan sentabr oxirida da’vo qo‘zg‘agandi. Model S P85D elektromobillarida “Telba tartib” ko‘zda tutilgan bo‘lib, unda avtomobil soatiga 100 kilometr tezlikka atigi 3,1—3,3 soniyada chiqishi lozim. Xaridorlar esa mashina bunday tezlikka chiqmagani va ularning ishonchini oqlamaganini bildirgan.
Ma’lumot uchun, mahalliy hukumat tomonidan elektromobillar sotib olish uchun subsidiyalar berilgani sababli Norvegiya Tesla uchun eng yirik bozor sanaladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)