Tesla Норвегияда қўзғалиш тезлигидан норози Model S P85D электромобилларининг 126 нафар эгаси билан келишувга эришди. Уларнинг адвокати Осло округ судига АҚШ компаниясига нисбатан даъволар қайтариб олиниши ҳақидаги жамоавий хатни топширди. Бу ҳақда «Интерфакс» хабар бермоқда.
Норвегиянинг Dagens Naeringsliv газетасига кўра, Tesla ҳар бир норози мижозга 65 минг крона (7,7 минг доллар) тўлашга рози бўлди. Автомобиль эгалари 129,7 минг крона товон пули талаб қилганди. Шунингдек, Tesla мижозларга турли бонуслар, жумладан, имтиёзли кредит ёки машина тюнингининг турли кўринишларини ҳам тақдим этди.
Норвегиялик мижозлар Tesla’га нисбатан сентябрь охирида даъво қўзғаганди. Model S P85D электромобилларида «Телба тартиб» кўзда тутилган бўлиб, унда автомобиль соатига 100 километр тезликка атиги 3,1—3,3 сонияда чиқиши лозим. Харидорлар эса машина бундай тезликка чиқмагани ва уларнинг ишончини оқламаганини билдирган.
Маълумот учун, маҳаллий ҳукумат томонидан электромобиллар сотиб олиш учун субсидиялар берилгани сабабли Норвегия Tesla учун энг йирик бозор саналади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)