LaFerrari auksionda 7 mln dollarga sotildi, tushgan mablag‘ Italiyadagi zilzilada jabrlanganlar fondiga o‘tkaziladi
Ferrari avtokonserni Deyton-Bichda (AQSh) Sotheby’s o‘tkazgan auksionda seriyadan tashqari LaFerrari avtomobilini 7 million dollarga sotdi. Tushgan mablag‘ Italiyada 2016-yil yozida sodir bo‘lgan zilzilada jabrlanganlarga yordam fondiga o‘tkaziladi, deya xabar beradi “Vedomosti”.
Konsern ushbu modelning bor-yo‘g‘i 499 avtomobilini chiqarishni mo‘ljallagandi. LaFerrari — Ferrari tarixidagi ilk gibrid superkari.
Avtomobil auksionda atigi 10 daqiqa ichida nomi oshkor etilmagan xaridorga sotildi. Uning bahosi dastlabki narxidan besh barobar oshib ketdi. Superkar Ferrari’ning kimoshdi savdolarida sotilgan eng qimmatbaho avtomobili bo‘ldi.
Eslatib o‘tamiz, joriy yil 24-avgustida Italiya markazida 6,4 balli zilzila ro‘y berdi. 300 nafarga yaqin kishi mazkur tabiiy ofat qurboni bo‘ldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
