O‘zbekiston Oliy Majlisi palatalarining 14-dekabr, chorshanba kuni bo‘lib o‘tadigan qo‘shma majlisida mamlakat bosh vaziri lavozimiga taqdim etilgan nomzod ham ko‘rib chiqilishi kutilmoqda. Bu haqda O‘zbekiston parlamentidagi manba “Daryo”ga ma’lum qildi.
Xabar berishlaricha, Oliy Majlis Qonunchilik palatasi va Senatining chorshanba kuni bo‘ladigan qo‘shma majlisida Abdulla Aripov O‘zbekiston bosh vaziri lavozimiga tasdiqlanishi mumkin.
12-dekabr, dushanba kuni O‘zbekiston prezidentiga O‘zLiDeP tomonidan bosh vazir lavozimiga Abdulla Aripov nomzodi taklif etilgan edi.
Konstitutsiyaga ko‘ra, O‘zbekiston Prezidenti taqdim etilgan bosh vazir lavozimiga nomzodni ko‘rib chiqqanidan keyin, 10 kun muddat ichida uni Oliy Majlis palatalarining ko‘rib chiqishi va tasdiqlashi uchun taklif etadi.
Bosh vazir nomzodi, uning uchun tegishincha Oliy Majlis Qonunchilik palatasi deputatlari va Senati a’zolari umumiy sonining yarmidan ko‘pi tomonidan ovoz berilgan taqdirda, tasdiqlangan hisoblanadi.
Qayd etish joiz, nomzod Oliy Majlisda uning nomzodi ko‘rib chiqilayotganda va tasdiqlanayotganda Vazirlar Mahkamasining yaqin muddatga va uzoq istiqbolga mo‘ljallangan harakat dasturini taqdim etadi.
Avvalroq, O‘zbekiston Oliy Majlisi palatalarining 14-dekabr kuni tashkil etiladigan qo‘shma majlisida mamlakatning saylangan Prezidenti Shavkat Mirziyoyev qasamyod qabul qilishi kutilayotgani haqida xabar berilgan edi.
Senat Shavkat Mirziyoyevni Bosh vazir lavozimidan ozod qildi
Shavkat Mirziyoyev 14-dekabr kuni O‘zbekiston Prezidenti sifatida qasamyod qilishi kutilmoqda
Izoh (0)