Samarqandda tramvay yo‘l izlarini o‘rnatish ishlari boshlab yuborildi

Samarqand shahriga “O‘zbekiston temir yo‘llari” aksiyadorlik jamiyati tomonidan tramvay yo‘l izlari olib kelinib, o‘rnatish ishlari boshlab yuborildi. Bu haqda Samarqand viloyat hokimligi axborot xizmati ma’lum qildi.

— Ikki kun ichida Sartepa maskanidan Buyuk Ipak yo‘li va Narpay ko‘chalari kesishgan hududgacha 4 kilometrga yaqin temiryo‘l izlarini yotqizib chiqdik. Hozircha yo‘lning bir tomonini yotqizib chiqyapmiz, — deydi “O‘zbekiston temir yo‘llari” aksiyadorlik jamiyatiga qarashli “TYMS – 203” korxonasi bosh muhandisi Obid Ummatov.

Bosh muhandisga ko‘ra, Navro‘z bayramiga qadar 16 kilometrlik yo‘l yotqizilib, Sartepa maskanidan Temir yo‘l vokzaliga qadar bo‘lgan qurilish ishlarining birinchi bosqichi to‘liq nihoyasiga yetkaziladi.

Ma’lumot uchun, Samarqandda 1947—1973-yillarda ham elektr tramvay qatnagan, u shahar temiryo‘l vokzali va Siyob bozori orolig‘ida harakatlangan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.