Роберт Блум: Президентлик сайлови сиёсий барқарорлик ва қонун устуворлиги кафолатларининг янада мустаҳкамланишига хизмат қилади

Ўзбекистонда бўлиб ўтадиган Президент сайлови халқаро ҳамжамият диққат марказида бўлиб, ижтимоий-сиёсий, эксперт-таҳлилий, илмий-академик доираларда ва оммавий ахборот воситаларида кенг муҳокама қилинмоқда. «Жаҳон» ахборот агентлиги мазкур муҳокамаларга эътибор қаратди.

Роберт Блум, Женева дипломатик корпуси президенти (Швейцария):

— Ўзбекистонда очиқлик ва демократик руҳда кечаётган сайловолди кампанияси давлат бошқаруви ва мамлакат аҳолисининг сиёсий маданиятини оширишда муҳим аҳамият касб этади.

Сайловда 4 сиёсий партиядан номзодларнинг иштирок этиши ва бу жараёнда транспарентликни таъминлаш бўйича амалга оширилган тадбирлар мамлакатда сиёсий барқарорликнинг ва қонун устуворлиги кафолатларининг янада мустаҳкамланишига хизмат қилади, деб ҳисоблайман.

Тўртта сиёсий партиянинг ҳам сайловолди дастурларини таҳлил этиш шуни кўрсатадики, уларнинг барчаси ҳам фуқароларнинг ҳуқуқ ва манфаатларини таъминлаш, мамлакатни иқтисодий ривожлантириш ва ижтимоий фаровонликка эришишни кўзда тутади. Назаримда, улар бир-бирини тўлдиради ва келажакда ушбу овоз бериш якунланганидан сўнг, сайловолди дастурларининг қай бири амалга оширилмасин, мамлакатда мавжуд умумий сиёсий ҳолат аниқ иқтисодий ва молиявий истиқболларни очади ҳамда хорижий ҳамкорларни Ўзбекистонга сармоя киргизишини рағбатлантиради.

Ежи Шукалский, Люблин университети ва Хелм Халқаро муносабатлар ва ижтимоий коммуникациялар олий мактаби профессори (Польша):

— Сўнгги йиллар давомида турли мамлакатлар сиёсий тизимларини тадқиқ қилиш ва парламентлари фаолиятлари таҳлили билан шуғулланиб келмоқдаман. Яқинда ўзбек парламентаризми шаклланишининг асосий босқичлари ўз аксини топган Олий Мажлис тизими, унинг вазифалари ва фаолиятига бағишланган монографиям эълон қилинди.

Бўлиб ўтадиган Президент сайлови, шахсий кузатувимга кўра, халқаро меъёрларга тўла мослиги билан бирга, ўзбек жамиятининг ўзига хос жиҳатларини ҳам намоён этади. Сайловолди жараёнлар муҳим босқич бўлиб, мазкур сиёсий тадбирнинг хусусияти ва натижасини, унинг транспарентлик даражаси ва номзодларнинг сиёсий малакаларини кўрсатиб беради.

Ўзбекистон сиёсий партиялари ва фуқаролари сайловга тайёргарлик кўриш ҳамда уни ўтказиш борасида тенг ҳуқуқ ва имкониятлар билан таъминланганини ҳам алоҳида қайд этиш лозим.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.