Yaponiyaning “Fukusima-1” atom elektr stansiyasi operatori sanaladigan Tokyo Electric Power (TEPCO) kompaniyasi bir guruh maktab o‘quvchilari uchun avariyaga uchragan stansiyaga sayohat uyushtirdi. Bu haqda “TASS” xabar bermoqda.
13 nafar o‘smir mutaxassislar radiatsiya tarqalishini bartaraf etish uchun halokat joyida qanday ishlayotganini o‘z ko‘zi bilan ko‘rish imkoniyatiga ega bo‘ldi.
Mainichi gazetasiga ko‘ra, Fukusima prefekturasidagi maktab ma’muriyati stansiya rahbariyatiga bolalarga avariya oqibatlarini ko‘rsatish yuzasidan iltimos bilan murojaat etdi. Odatda stansiyaga 18 yoshdan kattalar keladi, biroq mazkur holatda o‘quvchilarning ota-onalari bunga ruxsat berdi.
Umumiy hisobda bolalar stansiyada bir soatga yaqin bo‘ldi, uning aksar qismini avtobusda o‘tkazdi. Bu vaqt davomida stansiyaning birinchi reaktori joylashgan bino va zararlangan radioaktiv suv ombori borib ko‘rildi.
Sayohat chog‘i radiatsiya foni soatiga taxminan 10 mikrozivertga teng bo‘lgan, bu esa me’yordagidan salkam 40 barobar ko‘p.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)