Toshkentda Vazirlar Mahkamasining 2015-yil 5-avgustdagi 227-sonli hamda 2016-yil 28-iyundagi 215-sonli qarorlarida belgilangan ishlarni bajarish natijasida salkam 22 kilometrni tashkil qiluvchi uchinchi aylanma yo‘l barpo etildi. Bu ishlarni amalga oshirish uchun 122,226 milliard so‘m (39,4 million dollar) moliyalashtirildi, deb xabar beradi 1News.
“Toshkent oqshomi” gazetasining bildirishicha, quyidagi ko‘chalarda qurilish va rekonstruksiya ishlari amalga oshirildi: Amir Temur xiyobonidan Mirzo Ulug‘bek ko‘chasigacha davom etgan Mustaqillik ko‘chasi, Amir Temur xiyobonidan Kuloltepa ko‘chasigacha davom etgan Amir Temur shohko‘chasi, Sharof Rashidov ko‘chasidan Nukus ko‘chasigacha davom etgan Afrosiyob ko‘chasi, Taraqqiyot ko‘chasidan TTZ shohbekatigacha davom etgan Mirzo Ulug‘bek ko‘chasi, Mirzo Ulug‘bek ko‘chasidan TXAYgacha davom etgan Do‘rmon ko‘chasi, Mirzo Ulug‘bek ko‘chasidan Bog‘ishamol ko‘chasigacha davom etgan Do‘rmon yo‘li ko‘chalari rekonstruksiya qilindi. Bu ishlarni amalga oshirishga jami 13,201 milliard so‘m sarflandi.
Beruniy ko‘chasidan boshlab Bo‘rijar kanalidan o‘tgan ko‘prik orqali Oqtepa maydonigacha davom etgan Nurafshon ko‘chasining qurilishi davom ettirildi. Usmon Nosir hamda Muqimiy ko‘chalari kesishuvidan yo‘l o‘tkazgich orqali sobiq “Tashtekstilmash” korxonasi hududi bo‘ylab o‘tgan Nukus ko‘chasining davomi qurildi. Mirzo Ulug‘bek ko‘chasidan yo‘l o‘tkazgich bilan Ohangaron yo‘li ko‘chasigacha davom etgan Taraqqiyot ko‘chasi qurildi. Taraqqiyot ko‘chasi orqali KXYgacha yo‘l o‘tkazgich rekonstruksiya qilindi. Bu ishlarni amalga oshirishga Respublika yo‘l jamg‘armasi hisobidan 59,669 milliard so‘m sarflandi. Respublika budjeti hisobidan ajratilgan 31,580 milliard so‘mga Muqimiy va Shota Rustaveli chorrahasida yo‘l o‘tkazgich qurildi.
Tramvay liniyalarini demontaj qilish ishlaridan keyin yo‘l qoplamalarini tiklash ishlariga Toshkent shahar hokimiyati mahalliy budjet mablag‘lari moliyalashtirildi. Sariko‘l, Mehrjon, 8-mart, Eski Sariko‘l ko‘chalari orqali Farg‘ona yo‘ligacha Sayhun, Yangi Zamon, Abdurauf Fitrat, Haydar Aliyev ko‘chalari va Temiryo‘lchilar ko‘chasi orqali Shimoliy vokzalgacha qatnov qismi kengaytirilib rekonstruksiya qilindi va tegishli hududlarda obodonlashtirish ishlari amalga oshirildi. Uchtepa tumanidagi Sakkokiy, Almaiy va To‘qimachi ko‘chalarida tramvay liniyalarini demontaj qilish ishlaridan keyin asfalt qoplamasi tiklandi. Shota Rustaveli ko‘chasidan Oqtepa maydonigacha bo‘lgan Muqimiy ko‘chasida ham asfalt qoplamasi tiklandi. Toshkent xalqaro aeroport hududida avtoturargoh qurildi. Mustaqillik va Taraqqiyot ko‘chalari kesishuvidagi yo‘l o‘tkazgich, Abdulla Qodiriy va Mustaqillik ko‘chalari kesishuvidagi tunnel, Mustaqillik va KXY ko‘chalari kesishuvidagi yo‘l o‘tkazgichlar hamda Do‘rmon yo‘li ko‘chasidagi yo‘l o‘tkazgichlar joriy ta’mirdan chiqarildi. Mazkur ishlarni bajarishga 8,551 milliard so‘m pul mablag‘lari yo‘naltirildi.
Amir Temur ko‘chasidan Bunyodkor shohko‘chasigacha davom etgan O‘zbekiston ko‘chasi, Toshkent xalqaro aeroportidan Shota Rustaveli ko‘chasigacha davom etgan Bobur ko‘chasi, Bobur ko‘chasidan Mustaqillik ko‘chasigacha davom etgan Nukus ko‘chalari rekonstruksiya qilindi. Kuloltepa ko‘chasidan TXAYgacha davom etgan Amir Temur shohko‘chasi kapital ta’mirlandi. Toshkent shahar hokimligi mahalliy budjet mablag‘laridan bu ishlarga 9,843 milliard so‘m sarfladi.
Izoh (0)