O‘zbekiston kasaba uyushmalari Federatsiyasi Bosh vazirning virtual qabulxonasi tizimiga ulangan bo‘lib, mazkur tizim orqali kelib tushayotgan har bir murojaatning tez va sifatli bajarilishi bo‘yicha shaxsan birinchi rahbarning mas’ulligi belgilangan. Bu haqda “Daryo”ga Federatsiya matbuot xizmati ma’lum qildi.
Bugungi kungacha Kasaba uyushmalari Federatsiyasiga Bosh vazirning virtual qabulxonasidan jami 68 ta murojaat kelib tushdi. Ularning 31 tasi shikoyat, 34 tasi ariza, 3 tasi taklif shaklidagi murojaatdir.
Kelib tushgan murojaatlardan 37 tasi huquqiy himoyaga oid bo‘lib, ularda ishga tiklash, mehnat munosabatlarini rasmiylashtirish masalalari aks etgan. Ijtimoiy-iqtisodiy manfaatlar himoyasiga oid 15 ta murojaatda ish haqi va boshqa to‘lovlarni undirish, ish va dam olish vaqti bilan bog‘liq masalalar ko‘tarilgan.
Shuningdek, sanatoriy va sog‘lomlashtirish masalalariga oid 5 ta, kasaba uyushmalarining tashkiliy-huquqiy faoliyatiga oid 4 ta, moddiy yordam ajratishga oid 1 ta va ijtimoiy-mehnat munosabatlariga oid boshqa masalalar aks etgan 4 ta murojaat kelgan.
Ko‘rib chiqilgan murojaatlarning 27 tasi qanoatlantirildi, 32 tasiga tushuntirish berildi, 1 ta murojaat muallifning iltimosiga ko‘ra ko‘rmay qoldirildi. Hozirda ish yurituvida 8 ta murojaat mavjud.
Xususan, Toshkent viloyatidan tibbiyot xodimi A.S. (shaxsiy daxlsizlik huquqidan kelib chiqib, fuqarolarning ism-sharifi va ish joyi oshkor etilmadi) o‘z murojaatida ish beruvchi tomonidan mehnat shartnomasi noqonuniy bekor qilinganligi sababli, uni o‘z ishiga tiklashda amaliy yordam ko‘rsatishni so‘ragan. Kasaba uyushmalari mutaxassislari masalani o‘rganib chiqib, ish beruvchining haqiqatdan ham noqonuniy buyruq qabul qilganligini aniqladi. Natijada ish beruvchi buyrug‘i bekor qilinib, xodim A.S. o‘z ishiga tiklandi va unga majburiy progul uchun haq undirib berildi.
Qoraqalpog‘iston Respublikasida istiqomat qiluvchi fuqaro A.A. ta’lim tizimida ishlovchi turmush o‘rtog‘i bola parvarishlash ta’tilidan qaytgach, avvalgi ishiga tiklana olmayotganligi haqida murojaat etgan. O‘rganish jarayonida shikoyatda ko‘rsatilgan vajlar o‘z tasdig‘ini topdi hamda murojaat muallifining turmush o‘rtog‘i ish bilan ta’minlandi.
Qashqadaryo viloyatida neft-gaz tizimida faoliyat olib boruvchi fuqaro Y.M. ish beruvchi uni roziligisiz ish haqi kam bo‘lgan boshqa ishga o‘tkazganligi to‘g‘risida shikoyat bilan murojaat qildi. Kasaba uyushmalari mutaxassislari murojaatni joyiga chiqib o‘rganganda, haqiqatdan xodimni boshqa ishga o‘tkazish to‘g‘risida uning roziligisiz buyruq chiqarilganligi aniqlandi. Ish beruvchiga xodimning manfaatlarini ko‘zlab kiritilgan taqdimnomaga asosan noqonuniy buyruq bekor qilindi hamda fuqaro avvalgi lavozimiga o‘tkazildi.
Toshkent shahrida istiqomat qiluvchi fuqaro Sh.U. bola parvarishlash ta’tilida bo‘lgan vaqtida ish beruvchi mukofot pullarini bermayotganligi haqida murojaat yo‘llagan. O‘rganish jarayonida korxona jamoa shartnomasida bola parvrishlash ta’tilida bo‘lgan xodimlarga ham mukofotlar berilishi lozimligi qayd etilganligi aniqlanib, xodimga to‘lanmay qolgan mukofot pullari ish beruvchidan undirib berildi.
Shuningdek, xodimlarning ijtimoiy-iqtisodiy manfaatlari himoyasi bilan bog‘liq murojaatlar ham kasaba uyushmalari aralashuvi bilan qanoatlantirildi. Xususan, Xorazm viloyatida neft-gaz sohasida ishlovchi fuqaro M.M. farzandining to‘yi munosabati bilan ish beruvchi hisobidan 10 million so‘m ssuda olishda amaliy yordam so‘rab murojaat qildi. Kasaba uyushmalari mutaxassislari jamoa shartnomasining tegishli bandiga muvofiq xodim M.M. ga oylik ish haqidan uzish sharti bilan 10 million so‘m ssuda olishga ko‘mak berdi.
Izoh (0)