Тошкентда Вазирлар Маҳкамасининг 2015 йил 5 августдаги 227-сонли ҳамда 2016 йил 28 июндаги 215-сонли қарорларида белгиланган ишларни бажариш натижасида салкам 22 километрни ташкил қилувчи учинчи айланма йўл барпо этилди. Бу ишларни амалга ошириш учун 122,226 миллиард сўм (39,4 миллион доллар) молиялаштирилди, деб хабар беради 1News.
«Тошкент оқшоми» газетасининг билдиришича, қуйидаги кўчаларда қурилиш ва реконструкция ишлари амалга оширилди: Амир Темур хиёбонидан Мирзо Улуғбек кўчасигача давом этган Мустақиллик кўчаси, Амир Темур хиёбонидан Кулолтепа кўчасигача давом этган Амир Темур шоҳкўчаси, Шароф Рашидов кўчасидан Нукус кўчасигача давом этган Афросиёб кўчаси, Тараққиёт кўчасидан ТТЗ шоҳбекатигача давом этган Мирзо Улуғбек кўчаси, Мирзо Улуғбек кўчасидан ТХАЙгача давом этган Дўрмон кўчаси, Мирзо Улуғбек кўчасидан Боғишамол кўчасигача давом этган Дўрмон йўли кўчалари реконструкция қилинди. Бу ишларни амалга оширишга жами 13,201 миллиард сўм сарфланди.
Беруний кўчасидан бошлаб Бўрижар каналидан ўтган кўприк орқали Оқтепа майдонигача давом этган Нурафшон кўчасининг қурилиши давом эттирилди. Усмон Носир ҳамда Муқимий кўчалари кесишувидан йўл ўтказгич орқали собиқ «Таштекстильмаш» корхонаси ҳудуди бўйлаб ўтган Нукус кўчасининг давоми қурилди. Мирзо Улуғбек кўчасидан йўл ўтказгич билан Оҳангарон йўли кўчасигача давом этган Тараққиёт кўчаси қурилди. Тараққиёт кўчаси орқали КХЙгача йўл ўтказгич реконструкция қилинди. Бу ишларни амалга оширишга Республика йўл жамғармаси ҳисобидан 59,669 миллиард сўм сарфланди. Республика бюджети ҳисобидан ажратилган 31,580 миллиард сўмга Муқимий ва Шота Руставели чорраҳасида йўл ўтказгич қурилди.
Трамвай линияларини демонтаж қилиш ишларидан кейин йўл қопламаларини тиклаш ишларига Тошкент шаҳар ҳокимияти маҳаллий бюджет маблағлари молиялаштирилди. Сарикўл, Меҳржон, 8 март, Эски Сарикўл кўчалари орқали Фарғона йўлигача Сайҳун, Янги Замон, Абдурауф Фитрат, Ҳайдар Алиев кўчалари ва Темирйўлчилар кўчаси орқали Шимолий вокзалгача қатнов қисми кенгайтирилиб реконструкция қилинди ва тегишли ҳудудларда ободонлаштириш ишлари амалга оширилди. Учтепа туманидаги Саккокий, Алмаий ва Тўқимачи кўчаларида трамвай линияларини демонтаж қилиш ишларидан кейин асфальт қопламаси тикланди. Шота Руставели кўчасидан Оқтепа майдонигача бўлган Муқимий кўчасида ҳам асфальт қопламаси тикланди. Тошкент халқаро аэропорт ҳудудида автотураргоҳ қурилди. Мустақиллик ва Тараққиёт кўчалари кесишувидаги йўл ўтказгич, Абдулла Қодирий ва Мустақиллик кўчалари кесишувидаги туннель, Мустақиллик ва КХЙ кўчалари кесишувидаги йўл ўтказгичлар ҳамда Дўрмон йўли кўчасидаги йўл ўтказгичлар жорий таъмирдан чиқарилди. Мазкур ишларни бажаришга 8,551 миллиард сўм пул маблағлари йўналтирилди.
Амир Темур кўчасидан Бунёдкор шоҳкўчасигача давом этган Ўзбекистон кўчаси, Тошкент халқаро аэропортидан Шота Руставели кўчасигача давом этган Бобур кўчаси, Бобур кўчасидан Мустақиллик кўчасигача давом этган Нукус кўчалари реконструкция қилинди. Кулолтепа кўчасидан ТХАЙгача давом этган Амир Темур шоҳкўчаси капитал таъмирланди. Тошкент шаҳар ҳокимлиги маҳаллий бюджет маблағларидан бу ишларга 9,843 миллиард сўм сарфлади.
Изоҳ (0)