O‘zbekiston Respublikasi Markaziy saylov komissiyasining navbatdagi majlisi bo‘lib o‘tdi. Komissiya raisi M. Abdusalomov boshqargan majlisda siyosiy partiyalar vakillari, YXHT Demokratik institutlar va inson huquqlari bo‘yicha byurosi saylovni kuzatish missiyasi a’zolari, shuningdek, OAV xodimlari ishtirok etdi. Bu haqda O‘zbekiston Respublikasi Prezidenti saylovini yoritish bo‘yicha Respublika matbuot markazi ma’lum qildi.
Markaziy saylov komissiyasi ko‘zi ojiz fuqarolarning saylov huquqlarini ta’minlash, ular uchun Brayl alifbosida saylov byulletenlarini tayyorlash bo‘yicha qo‘shimcha chora-tadbirlarni qabul qildi.
Tadbirda qayd etilganidek, jamiyatni yanada yangilash va demokratlashtirish fuqarolarning saylov huquqlarini ta’minlash bilan uzviy bog‘liqdir. Milliy saylov tizimi, “O‘zbekiston Respublikasi Prezidenti saylovi to‘g‘risida”gi Qonun, unga so‘nggi yillarda kiritilgan o‘zgartish va qo‘shimchalar, shuningdek, saylovchilarning qonunlarda mustahkamlab qo‘yilgan huquq va erkinliklarini keng tushuntirish ishlari olib borilyapti. Tadbirlar aholining keng qatlami, xususan, xotin-qizlar, yoshlar, ayniqsa, birinchi marta ovoz beradigan yigit-qizlar, nuroniylar, jismoniy imkoniyati cheklangan shaxslar, harbiy xizmatchilar, fuqarolar yig‘inlari vakillari, mehnat jamoalarida, o‘quv muassasalarida, shuningdek, xorijda olib borilyapti.
Saylov kampaniyasida xalqaro kuzatuvchilarning ishtirok etishi saylov jarayonining ochiqligi va oshkoraligini mustahkamlashga xizmat qiladi. Ma’lumki, YXHT Demokratik institutlar va inson huquqlari bo‘yicha byurosi kuzatuvchilar missiyasining elchi Yoxan Peter Traugott Teyler boshchiligidagi asosiy guruhi saylov jarayonini kuzatish bo‘yicha o‘z faoliyatini davom ettirmoqda.
Majlisda YXHT Demokratik institutlar va inson huquqlari bo‘yicha byurosi kuzatuvchilar missiyasining mamlakatga shu yilning 6—7-noyabr kunlari tashrif buyurgan 20 nafar uzoq muddatli kuzatuvchilarini akkreditatsiya qilish to‘g‘risida qaror qabul qilindi.
Izoh (0)