Qozog‘istonda Ravon avtomobillari yig‘ila boshlaydi

Ravon Nexia Qozog‘istonning Qo‘stanay shahrida yig‘ila boshlaydi, deb yozadi “Bibi.uz” “Novaya gazeta” nashriga tayanib.

Qozog‘iston bosh vaziri birinchi o‘rinbosari Askar Maminga ishlab chiqarish obyektlariga tashrifi doirasida Ravon avtomobilining yangi modeli — Ravon Nexia ko‘rsatildi. Qo‘stanayda uni o‘zbekistonlik sheriklar bilan yig‘ish rejalashtirilmoqda, deyiladi xabarda.

“Bu Qozog‘istondagi eng arzon avtomobil bo‘ladi”, — dedi Allur Avto DK direktorlar kengashi raisi Andrey Lavrentyev. Uning narxi 2,6 million tenge (taxminan 23 800 000 so‘m)ga teng bo‘ladi.

Lavrentyev aytishicha, Qo‘stanayda Ravon yirik tugunli uslubda yig‘ila boshlaydi: butlovchi qismlar O‘zbekistondan keltiriladi, mahalliylashtirish 30 foizgacha bo‘ladi.

Birinchi Ravon avtomobilini chiqarish sanasi aniq emas, ammo zavoddagilar ta’kidlashicha, O‘zbekiston-Qozog‘iston qo‘shma korxonasi haqida bir nechta hujjatni imzolash qolgan, xolos.